આંધ્રપ્રદેશના કાકીનાડા જિલ્લા મુખ્યાલય પાસેના પેદ્દાપુરમ મંડલના કંદ્રાકોટાના ગ્રામીણો છેલ્લા ૨૦ દિવસથી નિંદ્રાહીન રાતોનો સામનો કરી રહ્યા છે. ગ્રામજનોનો આરોપ છે કે એક નગ્ન માણસ આંબાના ઝાડનો ઉપયોગ કરીને એક ઘરમાંથી બીજા ઘરમાં કૂદીને ગભરાટ ફેલાવી રહ્યો છે. તેમના કહેવા મુજબ, ૨૦ દિવસ પહેલા એક કાળા અને લાંબા માથાવાળો નગ્ન પુરુષ ગામમાં ફરતો હતો.

ગ્રામજનોનું કહેવું છે કે આ નગ્ન વ્યક્તિ રંગોળી બનાવી રહ્યો છે અને લીંબુ વડે પૂજા પણ કરી રહ્યો છે. આ પછી ગ્રામજનો ગભરાઈ ગયા હતા. જો કે વચ્ચે બે દિવસથી તે વ્યક્તિ ન દેખાતા ગ્રામજનોએ રાહત અનુભવી હતી. પરંતુ બે દિવસ પછી, તે રાત્રે ઝાડની મદદથી એક ઘરથી બીજા ઘરમાં કૂદવાનું શરૂ કર્યું. મધ્યરાત્રિ પછી એક વાગ્યે તે બૂમો પાડી રહ્યો હતો અને ૨:૩૦ વાગ્યે ગ્રામજનોને રડવાનો અને ચીસોનો અવાજ સંભળાયો હતો.

આ પછી ગામલોકો એક થઈને આખી રાત લાકડીઓ અને ટોર્ચ લાઈટ સાથે ગામમાં ફરતા હતા જેથી મુશ્કેલી સર્જનાર વ્યક્તિને શોધી શકાય. ગ્રામજનોના જણાવ્યા મુજબ, તેઓ રાત્રે લાકડીઓ અને લાઇટો સાથે આજુબાજુમાં જઈને ગામની રક્ષા કરતા હોવા છતાં, અજાણ્યા વ્યક્તિએ આંબાના ઝાડ પરથી કૂદીને ગામના એક ઘરનો દરવાજો તોડી નાખ્યો હતો.

કેટલાક ગ્રામજનોએ કહ્યું કે આ વિચિત્ર વ્યક્તિ બીજું કંઈ નથી પરંતુ એક દુષ્ટ શક્તિ છે અને અન્ય લોકોએ કહ્યું કે તે એક રાક્ષસ છે. ગામના કેટલાક અન્ય લોકોએ જણાવ્યું કે એક વ્યક્તિ આખા ગામને પરેશાન કરવાના ખરાબ ઈરાદાથી આ બધું કરી રહ્યો છે. એક ગામવાસીએ કહ્યું કે  છેલ્લા ૨૦ દિવસથી અમે જે વિચિત્ર સમસ્યાનો સામનો કરી રહ્યા છીએ તેનાથી અમે ખૂબ જ પરેશાન છીએ. ભગવાનને પ્રાર્થના કરવા ઉપરાંત, અમે સંબંધિત અધિકારીઓને શક્ય તેટલી વહેલી તકે સમસ્યાનું નિરાકરણ લાવવા વિનંતી કરી રહ્યા છીએ.