લોકસભા ચૂંટણી 2024માં ત્રીજા તબક્કાના મતદાન પહેલા તમામ નેતાઓ પુરી તાકાતથી પ્રચાર કરી રહ્યા છે. આ દરમિયાન નેતાઓ એકબીજા પર અંગત પ્રહારો કરવામાં જરાય શરમાતા નથી. કાકા શરદ પવાર પાસેથી રાષ્ટ્રવાદી કોંગ્રેસ પાર્ટી છીનવી લેનાર અજિત પવારે હવે ભત્રીજા રોહિત પવાર પર વ્યક્તિગત હુમલો કર્યો છે.

અજિત પવારે મહારાષ્ટ્રના પુણેમાં બારામતીમાં રેલી યોજી હતી. અહીં તેણે રોહિત પવારની મજાક ઉડાવી હતી. રાજ્યના નાયબ મુખ્ય પ્રધાને તેમના ભત્રીજા રોહિત પવારના રડવાની નકલ કરીને, ખિસ્સામાંથી રૂમાલ કાઢ્યો અને આંસુ લૂછ્યા. આ જોઈને સભામાં હાજર સૌ હસી પડ્યા.

ચૂંટણી રેલી દરમિયાન અજિત પવારે કહ્યું, "મેં પહેલેથી જ કહ્યું હતું કે કેટલાક લોકો તમારી ભાવનાઓ સાથે રમવાનો પ્રયાસ કરશે, પરંતુ આવી વસ્તુઓ કામ કરતી નથી." આ સાથે તેણે રડવાની એક્ટિંગ કરી જેને જોઈને તેના સમર્થકો જોરથી હસી પડ્યા. સુપ્રિયા સુલે માટે પ્રચાર કરતી વખતે રોહિત પવાર એક સભામાં ભાવુક થઈ ગયા હતા. તેમણે એનસીપીના તૂટવાનો ઉલ્લેખ કર્યો અને કહ્યું કે શરદ પવારે તેમને કહ્યું હતું કે સ્વાભિમાની મહારાષ્ટ્ર બનાવવા માટે નવી પેઢીને તૈયાર કરવાની જરૂર છે. આ પછી તે ભાવુક થઈને રડવા લાગ્યો. જો કે, અજિત પવારે તેની મજાક ઉડાવ્યા બાદ રોહિતે કહ્યું કે તેનો ભાવુક થવાનો કોઈ ઈરાદો નથી.