આ વર્ષની શરૂઆતમાં દિલ્હીમાં આયોજિત ઇન્ડિયા મોબિલિટી ગ્લોબલ એક્સ્પો દરમિયાન એરોસ્પેસ સ્ટાર્ટઅપ સરલા એવિએશને તેની એર ટેક્સીનું વિશ્વ સમક્ષ પ્રદર્શન કર્યું હતું. હવે કંપની ટૂંક સમયમાં દેશના કેટલાક મોટા શહેરોમાં એર ટેક્સી ઉડાનનું વ્યાપારી સંચાલન શરૂ કરવા જઈ રહી છે. કંપની પહેલા તેને બેંગલુરુમાં અને પછી અન્ય શહેરોમાં લોન્ચ કરશે.

કંપનીના સીઈઓ અને સહ-સ્થાપક એડ્રિયન શ્મિટ કહે છે કે, આ સેવા સૌપ્રથમ બેંગલુરુમાં શરૂ કરવામાં આવશે અને થોડા મહિનાઓ પછી, મુંબઈ અને દિલ્હીમાં પણ ઇલેક્ટ્રિક એર ટેક્સીઓ શરૂ કરવામાં આવશે. મીડિયાને આપેલા નિવેદનમાં એડ્રિયનએ જણાવ્યું હતું કે, "કંપનીનો ઉદ્દેશ્ય બેંગલુરુમાં લોન્ચ થયાના 5 વર્ષની અંદર દેશના બાકીના ભાગોમાં એર ટેક્સી સેવાઓ શરૂ કરવાનો છે.

સરલા એવિએશન 2028માં દેશમાં તેની સેવાઓ શરૂ કરવાનું લક્ષ્ય રાખે છે. આ યોજનાને શક્ય તેટલી વહેલી તકે આકાર આપવા માટે, કંપની ઝડપથી તેની ટીમનો વિસ્તાર કરી રહી છે. જાન્યુઆરીમાં 20 કર્મચારીઓથી શરૂ થયેલી કંપનીની ટીમ હવે 47 લોકોની થઈ ગઈ છે. શ્મિટે જણાવ્યું હતું કે, કંપનીનું લક્ષ્ય વર્ષના અંત સુધીમાં 80-120 કર્મચારીઓ રાખવાનું છે. ગયા વર્ષે, તેમણે બેંગલુરુ આંતરરાષ્ટ્રીય એરપોર્ટ સાથે સહયોગમાં ફ્લાઇંગ ટેક્સી સેવા શરૂ કરવાની યોજના બનાવી હતી.

કંપનીએ એક્સેલની આગેવાની હેઠળના સિરીઝ એ ફંડિંગ રાઉન્ડમાં 10 મિલિયન ડોલર પણ એકત્ર કર્યા છે. જેમાં ફ્લિપકાર્ટના બિન્ની બંસલ, નિખિલ કામથ અને સ્વિગીના શ્રીહર્ષ મજેતી સહિત અન્ય એન્જલ રોકાણકારોએ પણ ભાગ લીધો છે. શ્મિટે એ પણ સ્પષ્ટ કર્યું કે કંપનીનો મુખ્ય ઉદ્દેશ્ય સેવા પ્રદાતા નહીં, પરંતુ ઉત્પાદન પેઢી બનવાનો છે. તેઓ અન્ય કંપનીઓને ઇલેક્ટ્રિક એર ટેક્સીઓ સપ્લાય કરવા માટે પણ તૈયાર છે.

એક્સેલના નેતૃત્વમાં 10 મિલિયન ડોલરના ભંડોળ સાથે સરલા એવિએશન 2028 સુધીમાં બેંગલુરુમાં 30 ઉડતી એર ટેક્સીઓ શરૂ કરવાની યોજના ધરાવે છે. જે મુંબઈ અને દિલ્હી સુધી વિસ્તરશે. ટૂંકી શહેરી યાત્રાઓ માટે રચાયેલ, આ ટેક્સીઓ ભારતમાં હવાઈ ગતિશીલતાને પ્રોત્સાહન આપતી વખતે મુસાફરીનો સમય ઘટાડવાનો હેતુ ધરાવે છે.

હાલમાં, કંપનીએ ઝીરોનો પ્રોટોટાઇપ રજૂ કર્યો છે અને તે પ્રોડક્શન રેડી મોડેલ સુધી પહોંચતા તેમાં ઘણા ફેરફારો જોઈ શકાય છે. કંપનીનું કહેવું છે કે આ એર ટેક્સી 250 કિમી પ્રતિ કલાકની ઝડપે હવામાં ઉડી શકશે. તે આધુનિક બેટરી ટેકનોલોજી સાથે 160 કિમી સુધી મુસાફરી કરવા માટે રચાયેલ છે. પરંતુ તેનો ઉપયોગ 25-30 કિમી મુસાફરી કરવા માટે થશે. એટલું જ નહીં, તેમાં 6 મુસાફરો અને એક પાયલટ એકસાથે બેસી શકશે. આ એર ટેક્સી મહત્તમ 680 કિલો વજન ઉપાડવામાં સક્ષમ છે.

આ એર ટેક્સીનું કેબિન અદ્યતન સુવિધાઓ અને ટેક્નોલોજીથી સજ્જ હશે. 6-સીટર અને 4-સીટર, ઉપરાંત તેને કાર્ગો વાહન તરીકે પણ કસ્ટમાઇઝ કરી શકાય છે. જેનો ઉપયોગ ફક્ત પેસેન્જર વાહન તરીકે જ નહીં પરંતુ કાર્ગો કેરિયર તરીકે પણ થઈ શકે છે. તે ઇલેક્ટ્રિક વર્ટિકલ ટેક-ઓફ અને લેન્ડિંગ વાહન હોવાથી, તેને હવામાં ઉડવા માટે મોટા રનવેની જરૂર પડશે નહીં. તે તેની જગ્યાએથી ઊભી રીતે એટલે કે સીધી હવામાં ઉડી શકશે.

જોકે કંપનીએ હજુ સુધી આ એર ટેક્સીના ભાડા અંગે કોઈ ચોક્કસ આંકડો આપ્યો નથી, પરંતુ કંપનીનું કહેવું છે કે તેને સસ્તું રાખવા માટે તમામ પ્રયાસો કરવામાં આવશે. જેથી લોકો તેનો ઉપયોગ રોજિંદા સવારી તરીકે કરી શકે

એર ટેક્સની વિશેષતા

• બેઠક ક્ષમતાઃ ૧ પાયલોટ અને ૬ મુસાફરો
• પ્રોપલ્શનઃ 7 ઇલેક્ટ્રિક મોટર
• ટોપ સ્પીડઃ ૨૫૦ કિમી પ્રતિ કલાક
• કેપિસિટીઃ 680 કિગ્રા
• ઉડાનની કેપિસિટીઃ ૧૬૦ કિમી

કેન્દ્ર સરકારની 2026 સુધીમાં એર ટેક્સીઓ શરૂ કરવાની યોજના

કેન્દ્ર સરકાર 2026 સુધીમાં એર ટેક્સીઓ શરૂ કરવા માટે મૂળભૂત માળખાગત સુવિધા બનાવવાની યોજના પર પણ કામ કરી રહી છે. ગયા વર્ષે સપ્ટેમ્બરમાં, નાગરિક ઉડ્ડયન મહાનિર્દેશાલયે ઇલેક્ટ્રિક વર્ટિકલ ટેક-ઓફ અને લેન્ડિંગ વિમાન માટે એરવર્થનેસ સર્ટિફિકેટ મેળવવા માટે માર્ગદર્શિકા જારી કરી હતી. આ ઉપરાંત, સ્થાનિક એરલાઇન ઇન્ડિગોએ કેલિફોર્નિયા સ્થિત અન્ય એક એરોસ્પેસ ફર્મ આર્ચર પાસેથી 200 એર ટેક્સીઓનો ઓર્ડર પણ આપ્યો છે. આર્ચર એવિએશન 2026માં તેનું ઇલેક્ટ્રિક વર્ટિકલ ટેક-ઓફ અને લેન્ડિંગ વાહન "મિડનાઇટ" લોન્ચ કરવાની યોજના ધરાવે છે.