વીરપુરમાં દેવપરા વિસ્તારમાં રહેતા નરેશ રમેશભાઇ બુંધેલીયા(ઉ.વ ૩૪) નામના યુવાને વીરપુર પોલીસ સ્ટેશનમાં નોંધાવેલી ફરિયાદમાં આરોપી તરીકે ભગીરથ ઉર્ફે ભગી ખાચર અને બાબુ રાવળ(રહે. બંને દેવપરા,વીરપુર) ના નામ આપ્યા છે. આરોપી ભગીએ બાબુને રૂ.૪ હજાર આપી યુવાનનું ઘર સળગાવવા કહેતા આરોપી બાબુએ ડીઝલ લઇ યુવાનના ઘરમાં રાત્રીના મકાનના પાછળના ભાગેથી પ્રવેશ કરી ડીઝલ છાંટી આગ ચાંપી દીધી હતી.જોકે સદનસીબે યુવાનને કોઇ ઇજા પહોંચી ન હતી.

વધુમાં જાણવા મળતી વિગતો મુજબ,યુવાન આરોપી ભગીના ભત્રીજાની પત્ની સાથે ફોનમાં વાત કરતો હોય જે વાતની જાણ પરિવારને થઇ જતા દંપતી વચ્ચે ઝઘડો થયો હતો.બાદમાં વાત છુટાછેડા સુધી પહોંચી ગઇ હતી.બીજી તરફ યુવાન પણ અ માથકૂટ થયા બાદ વડોદરા ચાલ્યો ગયો હતો.દશેક દિવસ પૂર્વે તે પરત વીરપુર ફરતા ફરી બબાલ થઇ હતી.જેમાં આરોપીએ તેના ઘરને સળગાવી નાખવા માટે અન્ય શખસની મદદ લઇ આ કૃત્ય આચર્યું હતું.આ અંગે યુવાનની ફરિયાદ પરથી પોલીસે બંને આરોપી સામે ગુનો નોંધી કાયદેસરની કાર્યવાહી કરી હતી.