સૌરાષ્ટ્રમાં દશેરાથી ફરી મેઘરાજાનું આગમન થતા અને શનિ રવિ દરમિયાન એકથી પાંચ ઇંચ જેવો વરસાદ વરસતા પાંચ ડેમમાં સવા ફૂટ સુધી વરસાદી પાણીની આવક નોંધાઇ છે, જ્યારે કુલ 82માંથી 41 ડેમ સાઇટ ઉપર અઢી ઇંચ સુધી વરસાદ નોંધાયો છે.
વિશેષમાં રાજકોટ સિંચાઇ વર્તુળના ફ્લડ સેલના જણાવ્યા મુજબ છેલ્લા 24 કલાક દરમિયાનમાં રાજકોટ જિલ્લામાં આજી-2માં 1.18 ફૂટ, મોરબી જિલ્લામાં ડેમી-1માં 0.33 ફૂટ, બ્રાહ્મણી-2માં 1.31 ફૂટ, સુરેન્દ્રનગર જિલ્લામાં વઢવાણ ભોગાવો-1 (નાયકા) ડેમમાં 0.26 ફૂટ અને વઢવાણ ભોગાવો-2 (ધોળી ધજા) ડેમમાં 0.10 ફૂટ નવા નીરની આવક નોંધાઇ છે. રાજકોટ શહેરમાં રવિવારે એક ઇંચ વરસાદ વરસ્યો હતો, જ્યારે શહેરની ભાગોળે જામનગર રોડ ઉપર આવેલ ન્યારી-2 ડેમ ઉપર બે ઇંચ વરસાદ નોંધાયો હતો.