દિલ્હીના શાહદરાના ભોલાનાથ નગર વિસ્તારમાં આજ સવારે એક મકાનમાં આગ લાગી હતી. આગ એટલી ભીષણ હતી કે થોડી જ વારમાં ઘરની અંદર રહેલો આખો પરિવાર તેની ઝપેટમાં આવી ગયો હતો. રાહત ટીમ ઘટનાસ્થળ પર પહોંચે તે પહેલા અંદર રહેલા લોકોની હાલત ખરાબ થઈ ગઈ હતી અને તેઓ દાઝી ગયા હતા.

ફાયર વિભાગના અધિકારીઓના જણાવ્યા અનુસાર સવારે સાડા પાંચ વાગ્યે આગની માહિતી મળી હતી. માહિતી મળતાની સાથે જ ફાયર બ્રિગેડની 6 ગાડીઓ ઘટનાસ્થળે પહોંચી ગઈ હતી અને આગ પર કાબૂ મેળવ્યો હતો. જો કે આ આગમાં બે લોકોએ જીવ ગુમાવ્યા હતા. આગની ઘટના ઘર નંબર 197, શેરી નંબર 11, ભોલાનાથ નગરમાં બની હતી.

એફએસએલની ટીમ ઘટના સ્થળે પહોંચી

મૃતકોની ઓળખ 42 વર્ષીય શિલ્પી ગુપ્તા અને 16 વર્ષીય પ્રણવ ગુપ્તા તરીકે થઈ છે. બંને એક જ પરિવારના સભ્યો છે. આગની જાણ થતાં જ ઘટનાસ્થળે પહોંચેલા ફાયર બ્રિગેડના જવાનોએ રૂમની અંદર પડેલા ઘાયલ લોકોને જીટીબી હોસ્પિટલમાં લઈ ગયા હતાં, જ્યાં 72 વર્ષીય કૈલાશ ગુપ્તા, 70 વર્ષીય ભગવતી ગુપ્તા, 45 વર્ષીય મનીષ ગુપ્તા અને 19 વર્ષીય પાર્થ ગુપ્તાની સારવાર ચાલી રહી છે. ડૉક્ટરના જણાવ્યા અનુસાર પ્રાથમિક તપાસમાં બંનેના મોત શ્વાસ રૂંધાવાને કારણે થયા હોવાનું સામે આવ્યું છે. એફએસએલની ટીમ સ્થળ પર તપાસ કરી રહી છે.