અકસ્માતના આ બનાવની જાણવા મળતી વિગતો મુજબ, રાજકોટ ભાવનગર હાઈવે પર મહિકા ગામ નજીક વિઠ્ઠલવાવ ગૌશાળા પાસે આજરોજ વહેલી સવારના જીવલેણ અકસ્માતની ઘટના બની હતી.બનવાને પગલે આજીડેમ પોલીસ મથકનો સ્ટાફ બનાવસ્થળે પહોંચી હતી.

પૂરપાટ ઝડપે ધસી આવેલી બોલેરો કાર અહીં બ્રિજ પરથી નીચે ખાબકતા કારમાં સવાર બંને શખસો ફસાઈ ગયા હતા. બનાવની જાણ થતા આજીડેમ પોલીસ ઉપરાંત ફાયર બ્રિગેડનો સ્ટાફ અહીં પહોંચી ગયો હતો અને બોલેરો કારમાંથી બંને યુવાનોને બહાર કાઢવામાં આવ્યા હતા. દરમિયાન અહીં 108 ની ટીમ પણ આવી પહોંચી હતી 108 ના ઇએમટીએ જોઈ તપાસી આ બંને યુવાનોને મૃત જાહેર કર્યા હતા.

બનાવને લઇ પોલીસ દ્વારા જરૂરી કાર્યવાહી કરી બંનેના મૃતદેહોને પીએમ માટે હોસ્પિટલ ખસેડવામાં આવ્યા છે. પોલીસ દ્વારા અકસ્માતમાં મોતને ભેટનાર આ બંને યુવાનોની ઓળખ મેળવવા તપાસ હાથ ધરવામાં આવી છે.