તુર્કી ટીવી ચેનલ ટીઆરટી વર્લ્ડના અહેવાલ મુજબ, આ વાતચીત ગઈકાલે મોડી રાત્રે થઈ હતી. એટલે કે, ભારતીય સેના દ્વારા સરહદ પારના આતંકવાદી માળખા પર કરવામાં આવેલી ચોક્કસ કાર્યવાહીના એક દિવસ પછી પાકિસ્તાની એનએસએએ ડોભાલ સાથે ફોન પર વાત કરી હોવાના અહેવાલ છે. પાકિસ્તાનના નાયબ વડાપ્રધાન અને વિદેશ પ્રધાન ઇશાક ડારે ટીઆરટી વર્લ્ડ સાથેની મુલાકાતમાં આ વાતચીતની પુષ્ટિ કરી. ચેનલ અનુસાર, આ વાતચીત ભારતના એનએસએ અજિત ડોભાલ અને પાકિસ્તાનના એનએસએ અસીમ મલિક વચ્ચે થઈ હતી. 22 એપ્રિલે કાશ્મીરના પહેલગામમાં થયેલા આતંકવાદી હુમલા પછી આ પહેલી સીધી વાતચીત છે.

અહેવાલ મુજબ, ડારે વાતચીત વિશે વધુ વિગતો આપી ન હતી પરંતુ ટીઆરટી વર્લ્ડે અહેવાલ આપ્યો છે કે આ સંપર્કને બે પરમાણુ સશસ્ત્ર દેશો વચ્ચેના તણાવને ઘટાડવાના પ્રયાસ તરીકે જોવામાં આવી રહ્યો છે. જોકે, ભારત કે પાકિસ્તાનની કોઈપણ સત્તાવાર એજન્સી દ્વારા હજુ સુધી આ ટેલિફોન કોલની પુષ્ટિ કરવામાં આવી નથી.

22 એપ્રિલના રોજ પહેલગામમાં થયેલા આતંકવાદી હુમલામાં 25 પ્રવાસીઓ અને એક સ્થાનિક ડ્રાઈવર માર્યા ગયા હતા. એ પછી ભારતે વળતો જવાબ આપ્યો અને સરહદ પાર આતંકવાદી માળખાને નિશાન બનાવ્યું. આ ઓપરેશનને ‘ઓપરેશન સિંદૂર’ નામ આપવામાં આવ્યું હતું. ગઈકાલે, આ ઓપરેશનના વીડિયો અને ફોટા સોશિયલ મીડિયા પર વાયરલ થયા. ભારતે સ્પષ્ટપણે કહ્યું છે કે આ ઓપરેશન સંપૂર્ણ રીતે સફળ રહ્યું હતું અને ઓપરેશન દરમિયાન ફક્ત જૈશ-એ-મોહમ્મદ, લશ્કર-એ-તૈયબા અને હિઝબુલ મુજાહિદ્દીન સાથે સંકળાયેલા લક્ષ્યોને જ નિશાન બનાવવામાં આવ્યા હતા.

ભારત સરકારે સ્પષ્ટતા કરી કે કોઈ નાગરિક કે લશ્કરી સ્થાપનોને નુકસાન થયું નથી. બીજી તરફ, પાકિસ્તાને કોઈ નક્કર પુરાવા વિના દાવો કર્યો કે તેણે ભારતીય હુમલાને નિષ્ફળ બનાવ્યો છે. દિવસભર પાકિસ્તાન દ્વારા કરવામાં આવેલા અનેક દાવાઓને ભારતે ‘બનાવટી સમાચાર’ અને ‘ભ્રામક પ્રચાર’ તરીકે નકારી કાઢ્યા.

રાષ્ટ્રીય સુરક્ષા સલાહકાર (એનએસએ) અજિત ડોભાલે અમેરિકા, ચીન, યુકે, રશિયા અને સાઉદી અરેબિયાના તેમના સમકક્ષો સાથે વાત કરી. ડોભાલે આ દેશોના તેમના સમકક્ષોને જણાવ્યું હતું કે ભારતનો તણાવ વધારવાનો કોઈ ઈરાદો નથી પરંતુ જો પાકિસ્તાન આવું કરશે તો તે ‘દ્રઢતાથી જવાબ આપવા’ તૈયાર છે.

એનએસએ ડોભાલે યુએસ એનએસએ અને વિદેશ સચિવ માર્કો રુબિયો, ચીનના વિદેશ પ્રધાન વાંગ યી, રશિયન એનએસએ સેરગેઈ શોઇગુ, બ્રિટિશ એનએસએ જોનાથન પોવેલ, સાઉદી અરેબિયાના એનએસએ મુસૈદ અલ-ઐબાન, યુએઈના એનએસએ તાહનૌન બિન ઝાયેદ અલ નાહ્યાન, જાપાનના એનએસએ મસાતાકા ઓકાનો અને ફ્રેન્ચ રાષ્ટ્રપતિના રાજદ્વારી સલાહકાર ઇમેન્યુઅલ બોન સાથે અલગથી ફોન પર વાતચીત કરી. સૂત્રોએ જણાવ્યું હતું કે ડોભાલે તેમને 'ઓપરેશન સિંદૂર' વિશે કેટલીક માહિતી આપી હતી.

એક સૂત્રએ જણાવ્યું કે એનએસએએ તેમના સમકક્ષોને લેવામાં આવેલી કાર્યવાહી અને અમલીકરણની પદ્ધતિ વિશે માહિતી આપી. તેમણે કહ્યું કે ભારતની કાર્યવાહી માપદંડવાળી, તણાવ વધે નહી એવી, સંતુલિત અને જવાબદાર હતી. તેમણે ભારપૂર્વક જણાવ્યું હતું કે ભારતનો તણાવ વધારવાનો કોઈ ઇરાદો નથી પરંતુ જો પાકિસ્તાન આવું કરવાનું નક્કી કરે તો તે દ્રઢ જવાબ આપવા માટે સંપૂર્ણપણે તૈયાર છે.