સિહોર તાલુકાના વિવિધ ગામમાં વાડીઓ તેમજ મકાનમાં ચોરીઓ કરી હાહાકાર મચાવનાર તસ્કર ગેંગના ત્રણ શખ્સને સિહોર પોલીસે ઝડપી પાડયા હતા. પોલીસે આરોપીઓ પાસેથી કાર સહિત કુલ રૂા.૩, ૧૫, ૦૦૦ ની મતા કબજે કરી હતી. આરોપીઓ ચોરીના અન્ય કોઇ બનાવમાં સંડોવાયેલા છે કે કેમ ? તે દિશામાં પોલીસે આરોપીની ધનિષ્ઠ પૂછપરછ હાથ ધરી છે.
સિહોર પોલીસ મથક માં ચોરીના ચાર ગુના દાખલ થયા હતા જેમાં તસ્કરોએ વાડીમાંથી મોટર, પંપ અને કિબલ તેમજ મકાનમાંથી દાગીનાની ચોરી કરી હોવાની જણાવવામાં આવ્યું હતું. સિહોર પોલીસે આ બનાવ અંગે ગુનો દાખલ કરી તપાસ હાથ ધરી હતી. રાત્રે પોલીસ બુઢણા ગામ પાસે વાહન ચેકિંગ કરી રહી હતી તે સમયે એક કાર આવી હતી પરંતુ તેણે પોલીસને જોઈ કાર ભગાડી મુકી હતી. પોલીસે શંકાના આધારે આ કારનો પીછો કરતા  ત્રણે શખ્સ ટાણા ગામના પ્લોટ વિસ્તારમાંથી ઝડપાઈ ગયા હતા.જેમાં પંકજ  જીનુભાઈ બારૈયા, ગોપાલ ઉર્ફે કિશોર ઉર્ફે યુધો પરમાર અને પ્રદીષ લાલજીભાઈ પરમાર (ત્રણે રહે. મુળ ટાણા) હોવાનું જણાવ્યું હતું. પોલીસે આરોપીઓની પૂછપરછ કરતા તેમણે ચાર ચોરીના ગુતા આચર્યા હોવાની કબુલાત કરતા પોલીસે તેમની ધરપકડ કરી હતી. મોટર, પંખો, મોબાઇલ, મગફળી સહિતનો મુદ્દામાલ કબજે કર્યો હતો.