ગુજરાતમાં સ્કૂલો, હોટલો, કલેક્ટર ઓફિસ, સ્ટેડિયમને બોમ્બથી ઉડાવી દેવાની અવારનવાર ધમકીઓ મળે છે. પરંતુ આ વખતે ગુજરાત હાઈકોર્ટને બોમ્બથી ઉડાવી દેવાની ધમકી મળી છે. આથી પોલીસ તંત્ર દોડતું થઈ ગયું છે.

ડોગ સ્ક્વોડ અને બોમ્બ સ્કવોડ દ્વારા ચેકિંગ કરાયું

મળતી માહિતી મુજબ, હાઇકોર્ટના ઈ-મેઇલ પર અજાણી વ્યક્તિએ ગુજરાત હાઈકોર્ટને બોમ્બથી ઉડાવી દેવાનો ઈ-મેઇલ કર્યો છે. પોલીસને જાણ કરતા પોલીસ હાઈકોર્ટ પહોંચી છે. હાઈકોર્ટના ગેટ બંધ કરી ચેકિંગ શરૂ કરાયું છે. ડોગ સ્ક્વોડ અને બોમ્બ સ્કવોડ દ્વારા ચેકિંગ કરાયું છે.

ઈ-મેઇલ કરનારની પણ તપાસ કરવામાં આવી રહી છે

આ અંગે અમદાવાદ ઝોન 1 ઈન્ચાર્જ ડીસીપી સફીન હસને જણાવ્યું હતું કે, હાઇકોર્ટના ઈ-મેલ પર બોમ્બથી ઉડાવવાની ધમકી મળી છે જેને લઈને તપાસ કરવામાં આવી છે. હાઇકોર્ટના ગેટ બંધ કરી પોલીસ દ્વારા તપાસ કરવામાં આવી છે. ઈ-મેઇલ કરનારની પણ તપાસ કરવામાં આવી રહી છે.