શહેરના ભગવતીપરાના જય પ્રકાશનગરમાં રહેતા યુવકે બાથરૂમ સાફ કરવાનું લીકવીડ પી લેતા સારવાર માટે ખસેડવામા આવ્યો છે. યુવકએ પોતાના મિત્રને નાણાની જરૂરીયાત ઉભી થતા બીજા પાસેથી વ્યાજે લઇ આપ્યા હતા અને મિત્રએ એ પૈસા પણ ન ચૂકવી યુવકનું સ્કૂટર ગીરવી મૂકી પૈસા હજમ કરી જતા કંટાળી પગલું ભરી લીધું હતું.

પ્રાપ્ત વિગત મુજબ ભગવતીપરાના જયપ્રકાશનગરમાં રહેતો અને કડિયાકામની મજૂરી કરતો જયેશ કાનાભાઇ દાફડા (ઉ.વ.૨૯) નામના યુવાને રાત્રીના નવેક વાગ્યે ઘરે બાથરૂમ સાફ કરવાનું લિક્‍વીડ પી આપઘાતનો પ્રયાસ કરતાં સિવિલમાં ખસેડવામાં આવ્યો હતો. બનાવ અંગે હોસ્પિટલ ચોકીના સ્ટાફે બી ડિવિઝન પોલીસને જાણ કરી હતી.

જયેશના સગાના કહેવા મુજબ જયેશે થોડા સમય પહેલા તેના મિત્ર કાળીયાને રિક્ષા લેવા માટે પૈસાની જરૂર હોવાથી તેણે જયેશ પાસે માગ્યા હતા પરંતુ જયેશ પાસે આટલા પૈસા ન હોવાથી તેણે મોટા મવાના શખ્‍સ પાસેથી ૩૦ હજાર વ્‍યાજે લઈ મિત્રને અપાવ્‍યા હતાં. પણ બાદમાં મિત્ર કાળીયો વ્‍યાજ ભરતો ન હોઇ ઉઘરાણી થતાં બીજા પાસેથી પૈસા લઈને જયેશે વ્યાજે લીધેલા પૈસા ચૂકવ્યા હતા બાદમાં કાળિયા પાસેથી પૈસાની ઉઘરાણી કરતા મિત્રએ પોતાની પાસે હાલમાં પૈસા નથી તું તારુ એક્‍ટીવા દે તો તેના પર રકમ લઇ આપુ તેમ કહી જયેશનું એક્‍ટીવા લઇ જઇ ગીરવે મુકી તેમાં મળેલા પૈસા પણ ખાઈ ગયો હતો. આથી એક્ટિવા અને અગાઉના પૈસા પણ આપતો ન હોવાથી ટેન્સનમાં આવી પગલું ભરી લીધું હતું. વધુ તપાસ પોલીસે હાથ ધરી છે.