પોરબંદર શહેરના ૨૪૪૮ જેટલા ગરીબ પરિવારોને માત્ર ૫૦૦૦ ‚પિયા તથા ૫૦ હજાર રૂપિયા જેવા નજીવા દરે રહેવા માટે આવાસ મળી રહે તે માટે મિશન સીટી યોજના હેઠળ ૮૭૩ કરોડ રૂપિયાની ગ્રાન્ટ મંજુર થઈ હતી અને તેમાંથી બોખીરા થી કુછડી જતા રસ્તે ગરીબો માટેની આવાસ યોજનાનું નિર્માણ કરવામાં આવ્યુ હતુ અને ત્યા ૨૪૪૮ ફ્લેટ બનાવવામાં આવ્યા છે,જેમાં અંદાજે ચાર વર્ષ કરતા વધુ સમયથી લોકો વસવાટ કરી રહ્યા છે.આ આવાસ યોજનામાં લોકોને શાકભાજી સહિતની ચીજવસ્તુઓ સરળતાથી મળી રહે તે માટે શાકમાર્કેટનું નિર્માણ કરવામાં આવ્યુ હતુ,પરંતુ કોઈ કારણોસર ચાર વર્ષ પછી પણ આ શાકમાર્કેટમાં દુકાનો અને થડા શરૂ કરવામાં આવ્યા નથી તેના કારણે શાકમાર્કેટનો વિસ્તાર આવારા તત્વોનો અડો બની ગયો છે અને અહીંયા ઠેર-ઠેર દારૂની ખાલી કોથળીઓ ઉડી રહી છે.જે સાબિત કરી આપે છે કે અહીંયા દારૂની મહેફીલો જમાવવામાં આવે છે.માટે હવે પોરબંદર નગરપાલિકાના તંત્રએ આ શાકમાર્કેટનું વહેલીતકે લોકાર્પણ કરી દેવું જરૂરી બન્યું છે.