વડિયા તાલુકાના મોટી કુંકાવાવ ગામે સોમનાથ મહાદેવ મંદિરમાં થયેલી ચોરીનો ભેદ અમરેલી ક્રાઇમ બ્રાન્ચે ઉકેલી ચોરીમાં સંડોવાયેલા એમપીમાં ચાર શખ્સોને ઝડપી લઇ તેની પાસેથી ચાંદીનું છતર, શેષનાગ, બાઈક અને મોબાઈલ સહીત ૧,૦,૯૦૦૦નો મુદામાલ કબ્જે કર્યેા છે.
મળતી વિગત મુજબ ગત.તા.૧૬ના મોટી કુંકાવાવ ગામે દેરડી (કુંભાજી) રોડ પર આવેલા સોમનાથ મહાદેવના મંદિરમાં પ્રવેશી દરવાજાની ગ્રીલના નકુચા તોડી ગર્ભગૃહમાંથી ચાંદીનું છત્તર, પંચધાતુનો શેષ નાગ અને દાન પેટીની ચોરી થયાના બનાવના પગલે ભાવેશભાઈ બાબુભાઇ માથુકીયાએ વડિયા પોલીસ મથકમાં ફરિયાદ નોંધાવતા પોલીસે અજાણયા ચોર ઈશમો સામે ગુનો નોંધી તપાસ હાથ ધરી હતી.
 દરમિયાન અમરેલી ક્રાઇમ બ્રાન્ચની ટીમને ચોક્કસ બાતમી મળી હતી કે, પર પ્રાંતીય શખ્સો ચોરીની વસ્તુઓ વેચવા માટેની પેરવી કરી રહ્યા છે જે બાતમીના આધારે વોચ ગોઠવી શખ્સોને અટકાવી તપાસ કરતા શખસો પાસેથી ચાંદીનું છતર, શેષનાગ મળી આવતા શખસોની આકરી પુછપરછ કરતા કુંકાવાવના મંદિરમાંથી ચોરી કરી હોવાનું કબૂલાત આપતા એલસીબીએ ચાંદીનું છતર, શેષનાગ, મોબાઈલ અને બાઈક કબ્જે કરી પ્રતાપ પ્રેમસિંગ ભુરીયા, પ્રકાશ ઉર્ફે અરવિંદ જુવાનસિંગ ભુરીયા, બિલામ ઉર્ફે સુરેશ મંગળસીંગ ભુરીયા, રસીલ ઉર્ફે રાકેશ પ્રેમસિંગ ભુરીયા (તમામ રહે–મૂળ એમપી અને હાલ અમરાપુર,તા.વડિયા)ની ધરપકડ કરી આગળની કાર્યવાહી હાથ ધરી છે