પોરબંદરના  કૂતિયાણા તાલુકાના છત્રાવા ગામે નદીના પ્રવાહમાં ૧૯ વર્ષનો યુવાન તણાઇ ગયો હતો જેનો મૃતદેહ ચોવીસ કલાકે મળ્યો હતો. 
બનાવની વિગત એવી  છે કે કુતિયાણા તાલુકાના છત્રાવા ગામે રહેતો અભય ભુરાભાઇ ખુંટી નામનો ૧૯ વર્ષનો યુવાન તા. ૨૧-૧૦ના બપોરે છત્રાવા ગામે ધોબીડાના વાયામાં આવેલા નદીના પ્રવાહમાં તણાવા લાગ્યો હતો. આથી ગ્રામજનોને જાણ થતા અભયને શોધવાની કોશિષ કરી હતી તેની સાથોસાથ ફાયર બ્રિગેડને જાણ કરવામાં આવતા ફાયર જવાનો પણ દોડી ગયા હતા. શોધખોળ કરવા છતા પત્તો મળતો નહી હોવાથી કોસ્ટગાર્ડ અને નેવીને પણ જાણ કરી હતી અને દરિયાઇ સુરક્ષા એજન્સીના જવાનોએ પણ અભયની શોધખોળ હાથ ધરી હતી. હોળીઓ ઉતારીને તેની તપાસ હાથ ધરી હતી. પરંતુ ૨૧મી તારીખની રાત્રી સુધી કોઇ સફળતા મળી ન હતી. બીજે દિવસે ૨૨ના પણ ગ્રામજનો અને સુરક્ષા એજન્સીના જવાનો અભયની શોધમાં લાગી ગયા હતા પરંતુ અંતે બનાવના ચોવીસ કલાક પછી આ યુવાનનો મૃતદેહ મળી આવતા પરિવાર ઉપર વજ્રઘાત થયો હતો. 
છત્રાવાના  છોટુભાઇ ધુણસરભાઇ ખુંટીએ સમગ્ર બનાવ પોલીસમાં જાણ કરતા કુતિયાણાના પી.એસ.આઇ. કે.એન. ઠાકરીયાએ આગળની તપાસ હાથ કરી છે.