આ યુનિટ એરબસના સૌથી વધુ વેચાતા સિવિલ કેટેગરી એચ-125 હેલિકોપ્ટરનું ઉત્પાદન કરશે. ફ્રાન્સ, અમેરિકા અને બ્રાઝિલ પછી આ વિશ્વનો ચોથો આવો પ્લાન્ટ હશે. શરૂઆતમાં તે 10 હેલિકોપ્ટરની વાર્ષિક ઉત્પાદન ક્ષમતા સાથે કાર્યરત થશે. પરંતુ આગામી વર્ષોમાં વિસ્તરણ થશે કારણ કે એરબસનો અંદાજ છે કે આગામી 20 વર્ષોમાં ભારત અને દક્ષિણ એશિયામાં 500 હેલિકોપ્ટરની માંગ રહેશે.

આ પ્લાન્ટ બેંગલુરુથી લગભગ બે કલાક દૂર વેમગલ ઔદ્યોગિક વિસ્તારમાં બનાવવામાં આવશે, જ્યાં ટીએએસએલ પાસે પહેલાથી જ સેટેલાઇટ ઉત્પાદન એકમ સહિત અન્ય પ્લાન્ટ છે. ટાટાએ તાજેતરમાં વેમગલ ઔદ્યોગિક વિસ્તારમાં 7.4 લાખ ચોરસ ફૂટનો પ્લોટ હસ્તગત કર્યો છે, જ્યાં વિમાન ઉત્પાદન, અંતિમ એસેમ્બલી અને એમએમઓ (જાળવણી, સમારકામ અને ઓવરહોલ) સુવિધાઓ સ્થાપિત કરવામાં આવશે.

એક્વ્સના ચેરમેન અને સીઈઓ અરવિંદ મેલિગેરીએ જણાવ્યું હતું કે આ પહેલ દેશની સ્વદેશી ઉત્પાદન ક્ષમતાઓને મજબૂત બનાવશે અને સાથે સાથે અદ્યતન ઔદ્યોગિક ક્લસ્ટરોના વિકાસ માટે ઉત્પ્રેરક તરીકે કાર્ય કરશે. તેમણે કહ્યું કે આવા પ્રોજેક્ટ્સ કૌશલ્ય વિકાસ, સપ્લાય ચેઇનમાં રોકાણને વેગ આપે છે અને ઉચ્ચ-મૂલ્યની નોકરીઓ ઉત્પન્ન કરે છે, જે ભારતને વૈશ્વિક સ્તરે વ્યૂહાત્મક અને સ્પર્ધાત્મક એરોસ્પેસ ઉત્પાદન કેન્દ્ર બનાવે છે.

આ ઉપરાંત, ટાટા અને એરબસ ગુજરાતના વડોદરામાં સી-295 એરક્રાફ્ટની એસેમ્બલી લાઇન પણ સ્થાપિત કરી રહ્યા છે. ગુજરાતમાં તાજેતરમાં ઘણા મોટા રોકાણ પ્રોજેક્ટ્સ પ્રાપ્ત થયા છે, જેમાં સેમિકન્ડક્ટર પ્લાન્ટ, સી-295 એરક્રાફ્ટ મેન્યુફેક્ચરિંગ અને ઇન્ટરનેશનલ ડાયમંડ બુર્સનો સમાવેશ થાય છે. આ કારણોસર, વિરોધ પક્ષોએ કેન્દ્ર સરકાર પર ગુજરાતને પ્રાધાન્ય આપવાનો આરોપ પણ લગાવ્યો છે.