એસોસિએટેડ પ્રેસ સાથે શેર કરાયેલા ઈમેલ અનુસાર, વસ્તી ગણતરી વૈજ્ઞાનિક સલાહકાર સમિતિ અને 2030 વસ્તી ગણતરી સલાહકાર સમિતિના સભ્યોને ગઈકાલે એક નોટિસ મળી હતી જેમાં કહેવામાં આવ્યું હતું કે વાણિજ્ય સચિવ હોવર્ડ લુટનિકે નક્કી કર્યું છે કે સમિતિઓનું કાર્ય ‘પૂર્ણ’ થઈ ગયું છે. નેશનલ એસોસિએશન ઓફ લેટિનો ઇલેક્ટેડ એન્ડ એપોઇન્ટેડ ઓફિસર્સ એજ્યુકેશનલ ફંડે એક પ્રેસ રિલીઝમાં જણાવ્યું હતું કે જાતિગત, વંશીય અને અન્ય વસ્તી પરની રાષ્ટ્રીય સલાહકાર સમિતિને પણ વિખેરી નાખવામાં આવી છે. આ સમિતિઓના સભ્યોએ ફક્ત મુસાફરી અને રહેવાનો ખર્ચ લીધો અને બીજો કોઈ પગાર લીધો નહીં.

વાણિજ્ય વિભાગ વસ્તી ગણતરી બ્યુરોની દેખરેખ માટે જવાબદાર છે અને તેનું નેતૃત્વ ટ્રમ્પ દ્વારા નિયુક્ત લુટનિક કરે છે. 2030 ની વસ્તી ગણતરી સલાહકાર સમિતિના સભ્યોની નિમણૂક એક વર્ષ કરતા પણ ઓછા સમય પહેલા કરવામાં આવી હતી. તેના પ્રમુખ, આર્ટુરો વર્ગાસે એક મુલાકાતમાં કહ્યું હતું કે સમિતિઓને નાબૂદ કરવાનો નિર્ણય તેમની સમજની બહાર હતો. વર્ગાસે કહ્યું કે મને લાગે છે કે આ વસ્તી ગણતરી બ્યુરો માટે એક મોટો ફટકો છે. તેમણે કહ્યું કે બ્યુરોને આ બાહ્ય નિષ્ણાતો તરફથી ઘણી મદદ મળે છે અને તેઓ ઘણીવાર કાર્ય પ્રણાલીને સુધારવામાં મહત્વપૂર્ણ ભૂમિકા ભજવે છે. તેમણે કહ્યું કે આવી સ્થિતિમાં તેઓ આ નિર્ણયથી આશ્ચર્યચકિત છે.