રાજયમાં ગુનાખોરીને અંકુશમાં લેવા અને કાયદા વ્યવસ્થાની સ્થિતિ વધુ સુદ્રઢ બનાવવાના આશય સાથે સરકાર દ્રારા પોલીસને વધુ સશકત બનાવવાની દિશામાં પ્રયાસો કરવામાં આવી રહ્યા છે. જે અંતર્ગત સ્ટેટ મોનિટરીંગ સેલ દ્રારા અગાઉ દરોડા પાડવામાં આવ્યા બાદ જે તે પોલીસ સ્ટેશનમાં ગુનાઓ દાખલ કરવામાં આવતા હતાં પરંતુ હવે ખુદ એસએમસીનું જ પોલીસ સ્ટેશન કાર્યરત કરવામાં આવ્યું છે. આજરોજ ગાંધીનગર ખાતે એસએમસી કચેરીનું રાજય પોલીસ વડા વિકાસ સહાયના હસ્તે કાર્યરત કરવામાં આવી હતી.
ગૃહ વિભાગ ગુજરાત સરકાર સચિવાલય ગાંધીનગરના જાહેરનામાથી ગુજરાત રાજયના સમગ્ર વિસ્તાર માટે સ્ટેટ મોનિટરીંગ સેલને પોલીસ સ્ટેશનનો દરો મળ્યો હતો તેથી હવે ગંભીર ગુનાઓ મામલે એસએમસી દ્રારા દરોડાની કાર્યવાહી બાદ ગુનો પણ એસએમસી પોલીસ સ્ટેશનમાં નોંધવામાં આવશે. જેથી કામગીરીમાં સરળતા અને અસરકારકતા વધુ રહેશે. ગૃહ વિભાગ દ્રારા એસએમસી પોલીસ સ્ટેશનનો દરો મળ્યા બાદ આજરોજ ગાંધીનગર ખાતે સ્ટેટ મોનિટરીંગ સેલની આ કચેરીને રાજય પોલીસ વડા વિકાસ સહાયના હસ્તે ઉદઘાટન કરવામાં આવ્યું હતું. જે તકે એસએમસીના વડા નિર્લિ રાય સહિતના અધિકારીઓ પણ હાજર રહ્યા હતાં