આઈપીએલનો રોમાંચ પુરો થયો છે તે સાથે જ હવે સૌરાષ્ટ્રવાસીઓ માટે વધુ એક શાનદાર ક્રિકેટનો આનંદ મળવાનો છે છે આવતીકાલે સૌરાષ્ટ્ર ક્રિકેટ એસો.ના નિરંજન શાહ સ્ટેડીયમ ખાતે સૌરાષ્ટ્ર પ્રો-ટી-20 લીગનો પ્રારંભ થશે અને સૌરાષ્ટ્રના ક્રિકેટ ચાહકો પાંચ ટીમો વચ્ચે થનારા 21 મેચનો આનંદ માણી શકશે.

જેમાં સ્થાનિક ક્રિકેટરો આ સૌથી ટુંકા ફોરમેટમાં ભાગ લઈને ભવિષ્યના રાષ્ટ્રીય અને આંતરરાષ્ટ્રીય મંચ પર જવાનો માર્ગ પણ નિશ્ચિત કરશે. સતત બીજી વખત થઈ રહેલા આ આયોજનમાં સૌરાષ્ટ્ર અને કચ્છમાં શ્રેષ્ઠ ક્રિકેટ ટેલેન્ટના મનોરંજન અને ખેલકુદની ભાવનાનો અનેરો સંગમ જોવા મળશે.

આવતીકાલે નિરંજન શાહ સ્ટેડીયમ પર આ સૌરાષ્ટ્ર પ્રો ટી20 લીગનું ઉદ્ઘાટન કેન્દ્રીય ખેલકુદ મંત્રી મનસુખભાઈ માંડવીયાના હસ્તે થશે. અને તેમાં બપોરે 3-45 કલાકે શરૂ થનારા આ શાનદાર સમારોહ અને ત્યાર બાદના પ્રથમ મેચ પછી બોલીવુડની અભિનેત્રી જેકલીન ફર્નાન્ડીસ અને સલીમ-સુલેમાનના શાનદાર સંગીત સાથેના પફોર્મન્સ અને પ્રેક્ષકો આતશબાજીનો પણ આનંદ માણી શકશે.

કાલે ઉદઘાટન બાદ સાંજે 5 વાગ્યે શરૂ થશે અને ત્યારબાદ આ મનોરંજન કાર્યક્રમ યોજાશે. જેમાં સૌરાષ્ટ્રના અનેક જાણીતા ક્રિકેટરો અને અન્ય મહાનુભાવો પણ હાજરી આપશે.આ તમામ મેચોનું દૂરદર્શન અને જીયો હોટસ્ટોર પણથી લાઈવ ટેલીકાસ્ટ પણ થશે.