ગુજરાત રાજ્ય માર્ગ અને વાહન વ્યવહાર નિગમના રાજકોટ એસટી ડિવિઝનની લાઈન ચેકિંગ સ્ક્વોડ દ્વારા તાજેતરમાં સરપ્રાઇઝ ચેકિંગ હાથ ધરવામાં આવતા વિવિધ રૂટની ચાર બસમાં મુસાફરો પાસેથી પૈસા લઇને ટિકિટ નહીં આપી કટકી કરતા ચાર બસ કંડક્ટરને રંગેહાથ ઝડપી લઇને સસ્પેન્ડ કરવા ધોરણસરની કાર્યવાહી હાથ ધરી છે, જ્યારે ટિકિટ વિના મુસાફરી કરતા ઝડપાયેલા ૨૫ મુસાફરો પાસેથી રૂ.૭૦૦૦ના દંડની વસુલાત કરાઇ હતી.

વિશેષમાં રાજકોટ એસટી ડિવિઝનના વિભાગીય નિયામક જે.બી.કલોતરાએ જણાવ્યું હતું કે (૧) બસ અનિયમિત હોવી (૨) નિયત સ્ટોપ ઉપર બસ ઉભી ન રાખવી (૩) બસમાં સ્વચ્છતા ન હોવી (૪) બસની આગળ અને પાછળ રૂટ બોર્ડ ન હોવું (૫) ડ્રાઇવર અને કંડક્ટરે યુનિફોર્મ પહેર્યો હોય (૬) બસમાં ટિકિટ વિના મુસાફરી કરતા મુસાફરો મળવા (૭) મુસાફર પાસે નિયત વજન માત્રા કરતા વધુ લગેજ હોવો (૮) ટિકિટ લીધા બાદ મુસાફરને વધતી સામાન્ય પરચુરણ રકમ પરત ન આપવી (૯) ઓવર સ્પીડથી જોખમી ડ્રાઇવિંગ કરવું (૧૦) મુસાફરો સાથે વાણી, વર્તન, વ્યવહાર સારા ન હોવા વિગેરે સહિતની વિવિધ પ્રકારની ગેરશિસ્ત-નિયમભંગના કુલ ૧૧૧ કેસ કરવામાં આવ્યા હતા.