ખિરસરાના મોટાવડા સ્કૂલના ધોરણ ૧૧ના વિધાર્થીએ ૨૨ દિવસ પૂર્વે પોતાના ઘરે ગળાફાંસો ખાઇ આપઘાત કરી લીધો હતો, આપઘાત કરતા પૂર્વે વિધાર્થીએ સ્યુસાઇડનોટ લખી હતી અને એક વીડિયો બનાવ્યો હતો જેમાં સ્કૂલના પ્રિન્સિપાલ તથા બે શિક્ષિકાના ત્રાસથી કંટાળી પોતે પગલું ભર્યાનો ઉલ્લેખ કર્યેા હતો. જે અંગે આચાર્ય અને શિક્ષક સામે ગુનો નોધાયા બાદ ત્રણેય ભુગર્ભમાં ઉતરી ગયા હતાં.દરમિયાન મેટોડા પોલીસે આ બનાવમાં શાળાના પ્રિન્સિપાલની ધરપકડ કરી છે.જોકે, આચાર્યની આગોતરા જામીન અરજી રદ થતા તે પોલીસ સમક્ષ હાજર થયાની ચર્ચાએ પણ ભારે જોર પડકયું છે.
બનાવની જાણવા મળતી વિગતો મુજબ, છાપરા ગામમાં રહેતા અને મોટાવડાની સરકારી શાળામાં ધોરણ ૧૧માં અભ્યાસ કરનાર ધ્રુવિલ ભરતભાઇ વ (ઉ.વ.૧૬)એ ગત તા.૧૯ ઓકટોબરના પોતાના ઘરે ગળાફાંસો ખાઇ આપઘાત કરી લીધો હતો. ધ્રુવિલે આપઘાત કરતા પૂર્વે વીડિયો બનાવ્યો હતો જેમાં ધ્રુવિલે કહ્યું હતું કે, શાળાની પરીક્ષા ચાલતી હતી જેમાં શાળાના પ્રિન્સિપાલ સચિન અને બે શિક્ષિકા મોસમી મેડમ અને વિભૂતિ મેડમે તેના પર પેપરમાં ચોરી કર્યાનો અને પેપર બહારથી લખી આવતો હોવાનું આળ મુકયું હતું અને પોલીસમાં પકડાવી દેવાની ધમકી આપી હતી, આ કારણે પોતે અંતિમ પગલું ભર્યાનું જણાવ્યું હતું.
આપઘાતની આ ઘટના અંગે મૃતક વિધાર્થીના પિતા ભરતભાઇની ફરિયાદ પરથી મેટોડા પોલીસ સ્ટેશનમાં મોટાવડા હાઇસ્કુલના પ્રિન્સિપાલ અને શિક્ષિકા સામે આપઘાતની ફરજ પાડવા અંગેનો ગુનો નોંધાયો હતો.દરમિયાન આ ઘટનાના ૨૧ દિવસ બાદ ગઇકાલે મેટોડા પોલીસ સ્ટેશનના પીઆઇ શર્મા સહિતની ટીમે શાળાના આચાર્ય રૈયામાં રહેતા સચિન મનસુખ વ્યાસની કટારીયા ચોકડી પાસેથી ધરપકડ કરી હતી, જોકે અન્ય બે આરોપી શિક્ષિકા મોસમી અને વિભૂતિ હજુ પણ પોલીસને હાથ આવ્યા નહોતા.