ગોંડલના ભોજપરા ગામ પાસે અજાણી કારે રીક્ષાને હડફેટે લેતા રીક્ષામાં સવાર મુસ્લિમ પ્રૌઢા રીક્ષામાંથી બહાર ફંગોળાઈ કાર સાથે અથડાતા ગંભીર ઈજા થવાથી તેમનું મોત થયું હતું. રિક્ષામાં સાથે રહેલા તેમના અન્ય ત્રણ પરિવારજનોને ઈજા પહોંચી હતી. આ અંગે મહિલાના પુત્રની ફરિયાદ પરથી ગોંડલ તાલુકા પોલીસે અજાણ્યા કારચાલક સામે ગુનો નોંધી કાયદેસરની કાર્યવાહી કરી હતી.
અકસ્માતના આ બનાવની જાણવા મળતી વિગતો મુજબ, ગોંડલમાં ઘોઘાવદર રોડ પર સરગમ પાર્કમાં રહેતા અસલમ અખ્તરભાઈ કાદરી (ઉ.વ 30) નામના યુવાને ગોંડલ તાલુકા પોલીસ સ્ટેશનમાં નોંધાવેલી ફરિયાદમાં આરોપી તરીકે કાળા કલરની કારના ચાલકનું નામ આપ્યું છે. યુવાને ફરિયાદમાં જણાવ્યું હતું કે, તે ભુણાવા ચોકડી પાસે નોનવેજની દુકાન ચલાવી પરિવારનું ગુજરાન ચલાવે છે તેને સંતાનમાં એક પુત્ર એક પુત્રી છે.
ગત તારીખ 16/10 ના રાત્રીના નવ વાગ્યા આસપાસ અહીં દુકાનેથી ધંધો પૂરો કરી તે તથા તેનો ભાઈ તેમના માતા સવિતાબેન અખ્તરભાઈ કાદરી(ઉ.વ 55) તેમના નાની સકીનાબેન મહંમદભાઈ ગોંડલ ઘરે આવવા માટે રીક્ષા નંબર જીજે3 એયુ 3176 માં અહીંથી નીકળ્યા હતા. રીક્ષા અસલમ ચલાવતો હતો.
દરમિયાન ભોજપરા ગામ પાસે કષ્ટભંજન હનુમાનના મંદિર પાસે હાઇવે પર પહોંચતા એક કાળા કલરની ફોરવીલ કાર પુરપાટ ઝડપે ધસી આવી હતી અને રીક્ષાને પાછળના ભાગેથી ઠોકર મારતા જમણી બાજુ બેઠેલા યુવાનના માતા સાયદાબેન રિક્ષામાંથી બહાર ફંગોળાયા હતા અને તેમનું માથું કાર સાથે અથડાયું હતું બાદમાં તેમના પગ પરથી કાર ફરી વળી હતી જેથી તેમને ગંભીર ઈજા પહોંચતા પ્રથમ ગોંડલની ખાનગી હોસ્પિટલમાં ત્યારબાદ અહીં સરકારી હોસ્પિટલમાં લાવતા ફરજ પરના તબીબે જોઈ તપાસી તેમને મૃત જાહેર કયર્િ હતા. આ અકસ્માતમાં યુવાન તથા તેના નાની અને ભાઈને સામાન્ય ઇજા પહોંચી હતી. અકસ્માતની આ ઘટના અંગે યુવાનની ફરિયાદ પરથી પોલીસે અજાણી કારના ચાલક સામે ગુનો નોંધી તેને ઝડપી લેવા તપાસ હાથ ધરી છે.