જૂનાગઢ મહાનગરપાલિકા દ્રારા સ્વચ્છતા અભિયાનની ગુલબાંગો ફેંકવામાં આવે છે.પરંતુ ભરડાવાવ રોડ પર આવેલ જેટકો કચેરી પાસે જ સફાઈના અભાવે કચરાના ખડકલા  જોવા મળી રહ્યા છે અને મચ્છરોના ઉપદ્રવથી કર્મીઓમાં રોગચાળાની ભીતી સેવાઈ રહી છે.
જૂનાગઢ મહાનગરપાલિકા દ્રારા સ્વચ્છતા સર્વેક્ષણ અને 'ગ્રીન જૂનાગઢ કલીન જૂનાગઢ' અન્વયે વિવિધ વિસ્તારોમાં સફાઈ અભિયાન કરવાના દાવા કરી રહ્યું છે. પરંતુ સરકારી કચેરી પાસે જ ઉકરડા અને ગંદકીના ગંજથી મનપાની સફાઈ અભિયાન કામગીરી સામે પ્રશ્નાર્થ સર્જાયા છે.ભરડાવાવ રોડ પર જેટકોની કચેરી પાસે આડેધડ કચરો નાખવામાં આવી રહ્યો છે.ગટરનું પાણી પણ ત્યાંથી જ વહેતું હોવાથી મચ્છરોનો ઉપદ્રવ થઈ રહ્યો છે.નિયમિત સફાઈ થતી ન હોવાથી જેટકો કચેરીની દિવાલ પાસે ઝાડી ઝાંખરા ઊગી નીકળ્યા છે.મહાનગરપાલિકાને નિયમિત સફાઈ કરવા અવારનવાર રજૂઆત  કરવામાં આવી છે.પરંતુ સમસ્યાનો નિકાલ થયો નથી.સફાઈના અભાવે સરકારી કચેરી પાસે જ ગંદકીના ગંજથી કર્મીઓની હાલત પણ કફોડી થઈ છે.જેથી તાત્કાલિક સફાઈ કરવામાં આવે તેવી માંગ ઉઠી છે