પાકિસ્તાનના નાયબ વડા પ્રધાન અને વિદેશ પ્રધાન ઇશાક ડારે જાહેરાત કરી છે કે તેઓ આવતા મહિને બાંગ્લાદેશની મુલાકાત લેશે, જે 2012 પછી પાકિસ્તાની પ્રધાનની પ્રથમ મુલાકાત હશે. ગયા મહિને કૈરોમાં ડી-8 સમિટ દરમિયાન પાકિસ્તાનના વડા પ્રધાન શેહબાઝ શરીફ અને બાંગ્લાદેશના મુખ્ય સલાહકાર મુહમ્મદ યુનુસની મુલાકાતના અઠવાડિયા પછી આ જાહેરાત કરવામાં આવી છે. પૂર્વ વિદેશ મંત્રી હિના રબ્બાની ખાર 2012માં ઢાકાની મુલાકાત લેનાર છેલ્લા વિદેશ મંત્રી હતા.
ઇસ્લામાબાદમાં એક પ્રેસ કોન્ફરન્સમાં બોલતા ઇશાક ડારે જણાવ્યું હતું કે તેઓ 3-5 ફેબ્રુઆરીના મલેશિયા પ્રવાસમાંથી પરત ફયર્િ બાદ 5 ફેબ્રુઆરીએ અથવા તે પછી બાંગ્લાદેશની મુલાકાત લે તેવી શક્યતા છે. હસીના સરકારના પતન પછી પાકિસ્તાન અને બાંગ્લાદેશ તેમના સંબંધો સુધારવાનો પ્રયાસ કરી રહ્યા છે તેની નોંધ લેતા ઈશાક ડારે કહ્યું બાંગ્લાદેશ ખોવાયેલા ભાઈ જેવો છે. અમારો ધ્યેય આર્થિક અને વેપારી સહયોગને મજબૂત કરવાનો છે. ઇશાક ડારે કૈરોમાં એક બેઠક દરમિયાન યુનુસ અને તેના બાંગ્લાદેશી સમકક્ષને આપેલા આમંત્રણનો પણ ઉલ્લેખ કર્યો હતો. વિદેશ મંત્રીએ પુષ્ટિ કરી કે યુનુસે પરસ્પર સંમત તારીખો પર ઈસ્લામાબાદની મુલાકાત લેવાનું પાકિસ્તાનનું આમંત્રણ પણ સ્વીકાર્યું છે. મુહમ્મદ યુનુસે ગયા વર્ષે 5 ઓગસ્ટના રોજ વિદ્યાર્થીઓની આગેવાની હેઠળના વિરોધને પગલે તત્કાલીન વડા પ્રધાન શેખ હસીનાને સત્તા પરથી હટાવ્યા પછી મુખ્ય સલાહકાર તરીકેનો ચાર્જ સંભાળ્યો હતો.
નવી-મળેલી મિત્રતા બાદ, કરાચીથી પ્રથમ સીધુ માલવાહક જહાજ નવેમ્બરના મધ્યમાં બાંગ્લાદેશના ચિત્તાગોંગ બંદરે પહોંચ્યું હતું, જે અધિકારીઓએ જણાવ્યું હતું કે દ્વિપક્ષીય વેપારમાં એક મોટું પગલું હતું. બીજું કાર્ગો શિપ ડિસેમ્બરના અંતમાં પાકિસ્તાનથી બાંગ્લાદેશ પહોંચ્યું હતું. બાંગ્લાદેશે પાકિસ્તાનથી ટૂંક સમયમાં સીધી ફ્લાઈટ ફરી શરૂ કરવાની જાહેરાત કરી દીધી છે. કૈરોમાં તેમની બેઠક દરમિયાન, શહેબાઝ શરીફે ઢાકા અને ઈસ્લામાબાદ વચ્ચે વ્યૂહાત્મક સંબંધો માટે આહવાન કર્યું હતું અને કહ્યું હતું કે, અમે અમારા ભાઈ-દેશ બાંગ્લાદેશ સાથે અમારા સંબંધોને મજબૂત કરવા માટે ઉત્સુક છીએ. જોકે બાંગ્લાદેશે ઢાકાને ઈસ્લામાબાદ સાથેના સંબંધો ભવિષ્યની પેઢીઓ માટે હંમેશ માટે આગળ વધારવામાં મદદ કરવા માટે પાકિસ્તાનને 1971ના મુદ્દાઓ ઉકેલવા જણાવ્યું હતું. યુનુસે ઢાકાને ઈસ્લામાબાદ સાથેના સંબંધોને આગળ વધારવા માટે 1971ના મુદ્દાઓને ઉકેલવા માટે શરીફને વિનંતી કરી અને કહ્યું આ મુદ્દાઓ વારંવાર સામે આવી રહ્યા છે. ચાલો આગળ વધવા માટે તે મુદ્દાઓને હલ કરીએ. શેખ હસીનાના 15 વર્ષના કાર્યકાળ દરમિયાન પાકિસ્તાન અને બાંગ્લાદેશ વચ્ચેના સંબંધો તંગ રહ્યા હતા.