તારીખ 4 થી ગુજરાતમાં માવઠાનો વરસાદ શરૂ થયો છે અને છેલ્લા 24 કલાકમાં વધુ 160 તાલુકામાં સામાન્ય ઝાપટાથી સાત ઈચ સુધીનો વરસાદ થયો છે, વરસાદ કરતાં તોફાની પવન વધુ નુકસાની કરે છે. મંગળવાર સુધીમાં રાજ્યમાં તોફાની પવનના કારણે વૃક્ષો પડી જવાની, દીવાલો ધસી પડવાની, હોર્ડિંગ પડવાની અને વીજળી પડવા જેવી ઘટનાઓના કારણે 14 વ્યક્તિઓના મૃત્યુ થયા હતા. છેલા 24 કલાકમાં વધુ પાંચના મૃત્યુ થયા છે અને તેના કારણે કુલ મૃત્યુ આંક 19 થયો છે.

ઉનાળુ પાકને મોટા પ્રમાણમાં નુકસાન થયું

કરા સાથેના માવઠાના કારણે ઉનાળુ પાકને મોટા પ્રમાણમાં નુકસાન થયું છે, કેરીનો પાક પણ તૈયાર થઈને બજારમાં આવી રહ્યો છે બરાબર તેવા સમયે જ માવઠું થતાં અને તોફાની ભવન ફુકાતા કેરીના પાકને પણ વ્યાપક પ્રમાણમાં નુકસાન થયું છે.

આજે સવારથી જ વધુ 60 તાલુકામાં વરસાદ શરૂ થયો 

હવામાન ખાતાના જણાવ્યા મુજબ આજે સૌરાષ્ટ્ર કચ્છમાં રાજકોટ, અમરેલી, ભાવનગર, મોરબી, બોટાદ અને કચ્છ જિલ્લામાં જ્યારે ગુજરાતમાં નર્મદા ભરૂચ સુરત જિલ્લામાં ભારે વરસાદનું ઓરેન્જ એલર્ટ આપવામાં આવ્યું છે. આજે સવારથી જ વધુ 60 તાલુકામાં વરસાદ શરૂ થયો છે.

60 થી 70 કિલોમીટર ની ઝડપે પવન ફૂંકાશે

હવામાન વિભાગના જણાવ્યા મુજબ ગુજરાતમાં આજે અને આવતીકાલે એમ બે દિવસ માટે પ્રતિ કલાકના સરેરાશ 60 થી 70 કિલોમીટર ની ઝડપે પવન ફૂંકાશે. નોર્થ વેસ્ટ ઇન્ડિયામાં આવતી કાલથી ગરમીના પ્રમાણમાં ત્રણથી પાંચ ડિગ્રી જેટલો વધારો થશે પરંતુ ગુજરાતમાં હજુ ચાર દિવસ સુધી ગરમી વધે તેવી શક્યતા નથી. ગુજરાતમાં અત્યારે મહત્તમ તાપમાન 34 થી 35 ડિગ્રી વચ્ચે છે અને તેમાં પણ હજુ ત્રણથી ચાર ડિગ્રીનો ઘટાડો થવાની શક્યતા છે. ચાર દિવસ પછી ગુજરાતમાં મહત્તમ તાપમાન વધશે તેવું લાગે છે.