રાજ્ય સરકારની અનેકવિધ મહિલાલક્ષી યોજનાઓએ મહિલાઓની સુષુપ્ત શક્તિઓને ઉજાગર કરવાનું કામ કર્યું છે. સ્વ-સહાય જૂથ, સખીમંડળ દ્વારા વગર વ્યાજની બેંકલોન, મહિલા કેન્દ્રિત યોજનાઓએ મહિલાઓનું જીવનધોરણ સુધારવા ઉપરાંત સમાજમાં સ્વમાનભેર જીવન જીવવાનો માર્ગ બતાવ્યો છે. 
​​​​​​​
વેરાવળ તાલુકાના ઈન્દ્રોઈના આવા જ એક બહેન વેજીબહેન રાઠોડ છે. જેઓ વેફર, ભૂંગરા, ચકરી, કચોરી જેવા નાસ્તાઓ બનાવી તેનું વેચાણ કરે છે. આ રીતે ચકરીના વેચાણે તેમના જીવનના ચક્રને ફેરવ્યું છે અને તેઓ હવે આત્મનિર્ભર બન્યાં છે.
ગુજરાત સરકારના ગ્રામવિકાસ વિભાગ તેમજ ગુજરાત લાઈવલીહૂડ પ્રમોશન અને રાષ્ટ્રીય ગ્રામીણ આજીવિકા મિશન દ્વારા વેજીબહેન રાઠોડે પોતિકા વ્યવસાયના માધ્યમથી આર્થિક ઉપાર્જન કરી અને સ્વમાનભેર જીવવાનો રાહ પકડ્યો છે.
વેજીબહેન આ અંગે જણાવે છે કે, તેઓ પહેલા ખેતમજૂરી કરતા હતાં. તેનાથી તેમનો જીવનનિર્વાહ ચાલતો નહોતો.  ત્યારબાદ તેમણે સ્વસહાય જૂથ અંગેની જાણકારી મળતાં તેઓ સ્વ-સહાય જૂથ સાથે જોડાયા હતાં અને સરકારની આર્થિક સહાય મળી હતી.