અમેરિકાના દક્ષિણ કેરોલિનામાં ગત રાત્રે થયેલી ગોળીબારની ઘટનાએ સમગ્ર વિસ્તારમાં સનસનાટી મચાવી દીધી છે. સ્થાનિક વહીવટીતંત્રના જણાવ્યા અનુસાર, આ ઘટના દરિયાકાંઠાના શહેર લિટલ રિવરમાં રાત્રે 9:30 વાગ્યાની આસપાસ બની હતી, જેમાં ઓછામાં ઓછા 11 લોકો ઘાયલ થયા હતા અને તેમને હોસ્પિટલમાં દાખલ કરવામાં આવ્યા છે.

ગોળીબાર લિટલ રિવરમાં ઇન્ટ્રાકોસ્ટલ વોટરવે નજીકના રહેણાંક વિસ્તારમાં થયો હતો. આ વિસ્તાર મર્ટલ બીચથી લગભગ 32 કિલોમીટર (20 માઇલ) ઉત્તર-પૂર્વમાં સ્થિત છે. પોલીસને ઘટનાની માહિતી મળતા જ ડઝનબંધ પોલીસ વાહનો અને એમ્બ્યુલન્સ ઘટનાસ્થળે પહોંચી ગઈ. ચારે બાજુ અંધાધૂંધી હતી અને વિસ્તાર સંપૂર્ણપણે ઘેરી લેવામાં આવ્યો હતો.

હોરી કાઉન્ટી પોલીસના જણાવ્યા અનુસાર, ઘટનાસ્થળે તાત્કાલિક બચાવ અને તપાસ કામગીરી શરૂ કરવામાં આવી હતી. આ દરમિયાન, પોલીસને માહિતી મળી હતી કે ઘણા ઘાયલ લોકો ખાનગી વાહનોમાં હોસ્પિટલ પહોંચી રહ્યા છે, જેના કારણે ઘાયલોની વાસ્તવિક સંખ્યા વધી શકે છે. જોકે, ઘાયલોની સ્થિતિ અંગે હજુ સુધી કોઈ સત્તાવાર માહિતી શેર કરવામાં આવી નથી.

અત્યારસુધી પોલીસે કોઈ પણ શંકાસ્પદ વ્યક્તિની ધરપકડ કે ઓળખની પુષ્ટિ કરી નથી. આ ઉપરાંત, આ હુમલા પાછળનો હેતુ શું હતો તે પણ સ્પષ્ટ નથી. તપાસકર્તાઓ દરેક શક્ય ખૂણાની તપાસ કરી રહ્યા છે. પ્રત્યક્ષદર્શીઓની પૂછપરછ કરવામાં આવી રહી છે અને આસપાસના સીસીટીવી ફૂટેજની તપાસ કરવામાં આવી રહી છે.

મળતી માહિતી મુજબ, જે વિસ્તારમાં ગોળીબાર થયો હતો ત્યાં કેટલીક બોટિંગ અને મેરીટાઇમ બિઝનેસ ઓફિસો છે, પરંતુ આ વિસ્તાર મુખ્યત્વે રહેણાંક વિસ્તાર છે. આ ઘટનાથી સ્થાનિક રહેવાસીઓમાં ભય અને ચિંતા ફેલાઈ ગઈ છે.

પોલીસે સ્થાનિક લોકોને અપીલ કરી છે કે, જો કોઈને કંઈક શંકાસ્પદ દેખાય છે અથવા ઘટના સંબંધિત કોઈ માહિતી હોય તો તેઓ તાત્કાલિક પોલીસનો સંપર્ક કરે. હાલમાં, વિસ્તારમાં સુરક્ષા વધારી દેવામાં આવી છે અને આસપાસના વિસ્તારમાં પેટ્રોલિંગ વધુ તીવ્ર બનાવવામાં આવ્યું છે. આ ઘટનાએ ફરી એકવાર અમેરિકામાં બંદૂક હિંસા અંગે ચિંતા વ્યક્ત કરી છે. લોકો પૂછી રહ્યા છે કે નાગરિકો ક્યાં સુધી આવા હુમલાઓનો ભોગ બનતા રહેશે?