મહારાષ્ટ્રના પરભણીમાં એક ખૂબ જ ભયાનક ઘટના સામે આવી છે. અહીં પતિએ ત્રીજી પુત્રી હોવાના કારણે પત્ની પર પેટ્રોલ રેડીને સળગાવી દીધી હતી અનેમહિલાનું મોત થયું હતું. પોલીસે આરોપીની ધરપકડ કરી લીધી છે. આ ઘટના સીસીટીવીમાં કેદ થઈ ગઈ છે.

મહારાષ્ટ્રના પરભણી જિલ્લામાં એક દર્દનાક ઘટના સામે આવી છે. અહીં ગંગાખેડ નાકા વિસ્તારમાં 26 ડિસેમ્બરની રાત્રે એક વ્યક્તિએ તેની પત્ની પર પેટ્રોલ છાંટીને તેને આગ ચાંપી દીધી હતી. આરોપ છે કે મહિલાનો પતિ ગુસ્સે હતો કે પત્નીએ ત્રીજી વખત પુત્રીને જન્મ આપ્યો હતો. આ ઘટનાએ લોકોને ચોંકાવી દીધા છે. આ ઘટના સીસીટીવીમાં કેદ થઈ ગઈ છે, જેની તસવીરો હૃદયને હચમચાવી દે તેવી છે.

મળતી માહિતી મુજબ પીડિતાની બહેન 34 વર્ષીય મૈના કુંડલિક કાલેએ પોલીસ સ્ટેશનમાં ફરિયાદ નોંધાવી છે. એવું કહેવાય છે કે આરોપી કુંડલિક ઉત્તમ કાળે તેની પત્નીને સતત ટોણો મારતો અને મારઝૂડ કરતો હતો કારણ કે કુંડલિકને ત્રણ દીકરીઓ હતી. આ બાબતે પતિ-પત્ની વચ્ચે અવારનવાર ઝઘડા થતા હતા.

26 ડિસેમ્બરની રાત્રે, વિવાદ એટલો વધી ગયો કે કુંડલિકે મૈના પર પેટ્રોલ રેડીને તેને આગ લગાવી દીધી. આગ લાગતાની સાથે જ મહિલાએ બૂમો પાડતા અહીં-ત્યાં દોડવા લાગી. લોકોએ આ જોઈને આગ ઓલવવાનો પ્રયાસ શરૂ કર્યો હતો. ઘટનાસ્થળે મોટી સંખ્યામાં લોકો એકઠા થઈ ગયા હતા. પેટ્રોલના કારણે ભારે મુશ્કેલીથી આગને કાબુમાં લેવામાં આવી હતી, પરંતુ ત્યાં સુધીમાં ઘણું મોડું થઈ ગયું હતું. ગંભીર રીતે દાઝી ગયેલી મૈનાને હોસ્પિટલમાં લઈ જવામાં આવી હતી, પરંતુ સારવાર શરૂ થાય તે પહેલાં જ તેનું મોત થયું હતું.

આ કેસમાં પોલીસે ફરિયાદના આધારે કુંડલિક કાલે સામે હત્યાનો ગુનો નોંધી તેની ધરપકડ કરી છે. પોલીસ દ્વારા આરોપીની પૂછપરછ કરવામાં આવી રહી છે. જ્યાં સુધી તપાસ પૂરી ન થાય ત્યાં સુધી પોલીસ આ મામલે કોઈ નિવેદન આપવા તૈયાર નથી.

ઘટના બાદ સમગ્ર વિસ્તારમાં રોષનો માહોલ છે. લોકોનું કહેવું છે કે આ ઘટનાએ ફરી એકવાર સાબિત કર્યું છે કે સમાજે દીકરીઓ પ્રત્યે પોતાની વિચારસરણી બદલવાની જરૂર છે. કાયદાનો વધુ કડક અમલ કરવો અને દીકરીઓ માટે સન્માનનું વાતાવરણ ઊભું કરવું એ સમયની જરૂરિયાત છે.