પોરબંદર નજીકના રોધડા ગામે હિટાચી મશીનના ડ્રાઇવર ઉપર  હુમલો થતા પોલીસ ફરિયાદ દાખલ થઇ છે.
પોરબંદરના દિગ્વિજયગઢ ગામે રહેતા અને હીટાચી મશીનમાં ડ્રાયવર તરીકે કામ કરતા માલદે કાનાભાઇ કદાવલા નામના ૪૦ વર્ષના યુવાને એવી પોલીસ ફરિયાદ નોંધાવી છે કે તે બે વર્ષથી હીટાચી મશીનમાં ડ્રાયવર તરીકે કામ કરે છે અને છેલ્લા પાંચેક દિવસથી રોધડા ગામે આવેલ ખારી ચેકડેમમાં હીટાચી મશીન ચલાવે છે. તા. ૬-૫ના તેને ખાતેદાર સંજય ભોજાભાઇ રાણાવાયાની ખારી ચેક ડેમમાંથી માટી કાઢવાની પરમીટ હોવાથી સવારે માટી કાઢવાનું કામ શ‚ કર્યુ હતુ ત્યારે બે બાઇકમાં ત્રણ જેટલા ઇસમો ત્યાં આવી પહોંચ્યા હતા  અને ફરિયાદી માલદેને ‘તું અહીં કોને પૂછીને મશીન ચલાવે છે?’ તેમ કહેતા ફરિયાદીએ એવું જણાવ્યુ હતુ કે, ‘હું તો ડ્રાયવર છું, મને કંઇ ખબર નથી શેઠને પૂછી લો.’ તેમ કહેતા બે વ્યક્તિઓ જેમાં એક નારણ વિભાભાઇ અને બીજો અજાણ્યો માણસ બંને  હિટાચી મશીનની કેબીન ઉપર ચડી ગયા હતા અને ફરીયાદી સાથે ગાળાગાળી કરી, ઝપાઝપી કરવા લાગ્યા હતા અને ઢીકાપાટુનો માર મારવા લાગ્યા હતા. અને નીચે ઉભેલ વ્યકિત કે જેનું નામ જગદીશ જલુ છે તે ત્યાંથી ગાળો આપતો  હતો. આથી ફરિયાદીએ બુમાબુમ કરતા તેમના શેઠ ત્યાં આવી ગયા હતા અને તેના મારથી બચાવ્યા હતા. જતા-જતા તેઓ કહેતા ગયા હતા કે, ‘ તમારું મશીન અહીંથી ઉપાડી લેજો નહીંતર જીવતા મારી નાખીશુ અને હીટાચી મશીન સળગાવી નાખીશું’ તેમ કહી ધમકી આપી જતા રહ્યા હતા. ફરિયાદીને ઇજા થઇ હોવાથી કુતિયાણા પોલીસ મથક ખાતે ફરિયાદ નોંધાવીને પ્રાથમિક સારવાર લીધી હતી. જેમાં આરોપી તરીકે નારણ વિભા, જગદીશ જલુ અને અજાણી વ્યક્તિ સામે એફ.આઇ.આર. થઇ છે.