જેતપુરમાં કેનાલના પુલ પાસે રૈયારાજમાં રહેતા કલર અને કેમિકલના વેપારી યુવાનને પિતા-પુત્ર સહિત ચાર શખસોએ મારમારી માથામાં લોખંડનો પાઇપ ફટકારી દીધો હતો. હુમલામાં ઘવાયેલા યુવાનને સારવાર માટે રાજકોટ ખસેડવામાં આવ્યો હતો. યુવાન તેના મિત્ર સાથે વાત કરતો હતો ત્યારે આરોપી વચ્ચે બોલતો હોય જેથી તેને વચ્ચે બોલવાની ના કહેતા આ બાબતોનો ખાર રાખી હુમલો કર્યો હતો.
બનાવની જાણવા મળતી વિગતો મુજબ, જેતપુરમાં રૈયારાજ 2 રિલાયન્સ પેટ્રોલ પંપ સામેની શેરીમાં રહેતા કલર અને કેમિકલના વેપારી હિરેન ઉર્ફે ગટી રસિકભાઈ વઘાસિયા(ઉ.વ 38) દ્વારા જેતપુર સિટી પોલીસ સ્ટેશનમાં નોંધાવવામાં આવેલી ફરિયાદમાં આરોપી તરીકે અને જેતપુરમાં જ રહેતા કૌશિક બરવાડીયા, તુષાર કાંતિભાઈ આંબલીયા, ભાવિન કાંતિભાઈ આંબલીયા અને કાંતિ આંબલીયાના નામ આપ્યા છે.
યુવાને પોતાની ફરિયાદમાં જણાવ્યું હતું કે, ગત તારીખ 18-10 ના રાત્રીના દસેક વાગ્યે તે તેના મિત્રો નિરવ સેંજરીયા તથા નિલેશ વોરા જે સુરતથી આવ્યા હોય જેથી તે અમરનગર રોડ પર શુકન પ્લાઝા કોમ્પ્લેક્સની બાજુમાં ચાની દુકાને તેની સાથે ચા પીતો હતો. બાદમાં તેઓ ધંધાની વાત કરતા હતા તે સમયે નીરવનો મિત્ર કૌશિક બરવાળીયા વચ્ચે બોલ બોલ કરતો હોય તેથી તેને વચ્ચે બોલવાની ના પાડતા તે ઉશ્કેરાઇ યુવાન સાથે બોલાચાલી કરવા લાગ્યો હતો. બાદમાં કૌશિક કે કોઈની સાથે ફોનમાં વાત કરી ત્યાંથી જતો રહ્યો હતો.
20 મિનિટ બાદ યુવાન તેનું બાઈક લઇ જમવા માટે ગયો હતો અને તેના મિત્રો નીરવ અને નિલેશ પાછળ કાર લઈને આવતા હતા. દરમિયાન અમરનગર રોડ પર જય પાન પાસે પહોંચતા કૌશિક, તુષાર, ભાવિન અને તુષારના પિતા કાંતિભાઈ સહિતના અને ઉભા હોય તેને યુવાનને અહીં બાઈક ઊભું રાખવા કહ્યું હતું. બાદમાં આ શખસો યુવાનને ગાળો આપવા લાગ્યા હતા જેથી તેણે ગાળો આપવાની ના કહેતા ઢીકાપાટુનો માર મારવા લાગ્યા હતા.આ સમયે ભાવીને આવેશમાં આવી લોખંડનો પાઇપ લઈ યુવાનના માથાનાભાગે ફટકારી દીધા હતા. દરમિયાન નીરવ અને નિલેશ આવી જતા આ શખસો અહીંથી નાસી ગયા હતા. ત્યારબાદ ઇજાગ્રસ્ત યુવાનને પ્રથમ જેતપુર બાદમાં વધુ સારવાર માટે રાજકોટની ખાનગી હોસ્પિટલમાં ખસેડવામાં આવ્યો હતો. જ્યાં તેને માથાનાભાગે ચાર ટાંકા આવ્યા હતા. આ અંગે યુવાનની ફરિયાદ પરથી પોલીસે ચાર શખસો સામે ગુનો નોંધી જરૂરી કાર્યવાહી કરી છે.