રાજ્ય ચૂંટણી આયોગ દ્વારા તા.21 જાન્યુઆરીથી વિવિધ સ્થાનિક સ્વરાજ્યની સંસ્થાઓની ચૂંટણી હેઠળના વિસ્તારોમાં આદર્શ આચાર સંહિતા અમલમા મુકવામાં આવી છે ત્યારે રાજકોટ જિલ્લામાં ભાયાવદર, જસદણ, જેતપુર-નવાગઢ, ધોરાજી તથા ઉપલેટા નગરપાલિકાની ચૂંટણીનુ મતદાન તા.16 ફેબ્રુઆરીના રોજ યોજાશે.
તદઉપરાંતઉપરાંત ઉપલેટા 04, ડુમીયાણી 13- પાનેલી મોટી -1, જસદણની 1-આંબરડી,5 ભાડલા, જેતપુરની 15- પીઠડીયા, ગોંડલની 20- સુલતાનપુર તાલુકા પંચાયત બેઠકોની પેટા ચૂંટણી પણ તા.16 ફેબ્રુઆરી ના રોજ યોજાશે. તા.16 ફેબ્રુઆરીએ મતદાનના દિવસે સવારના સાત વાગ્યાથી સાંજના છ વાગ્યા સુધી મતદારો મતદાન કરી શકશે.તા.18 ફેબ્રુઆરી મત ગણતરીની હાથ ધરાશે. આ ઉપરાંત મતદારો નોટાનો ઉપયોગ પણ કરી શકાશે, મતદાનના દિવસે ભાઈઓ, બહેનો, યુવાનો, દિવ્યાંગ મતદારો, વરિષ્ઠ મતદારો સહિત તમામ મતદારો પોતાના મતાધિકારનો ઉપયોગ કરે તેવી અપીલ જિલ્લાના નોડલ અધિકારીએ કરી છે. મતદાનના દિવસે શ્રમિકો, કામદારો, કર્મચારીઓને મતદાન કરવા ત્રણ કલાકની રજા જે તે સંસ્થાઓ, કંપ્નીઓ દ્રારા આપવામાં આવશે. દરેક મતદાર મતદાન કરી પોતાની ફરજ અદા કરે તે ઇચ્છનીય છે.

શ્રમયોગીઓને મતદાન માટે રજા આપવા આદેશ
રાજયની મહાનગરપાલિકાઓ, નગરપાલિકાઓ, જિલ્લા પંચાયતો અને તાલુકા પંચાયતોની સામાન્ય/મધ્યસત્ર-પેટા ચૂંટણી મતદાન તા.16-2-2025ના રવિવારના સવારે 7 વાગ્યાથી સાંજના 6 વાગ્યા સુધી યોજાશે. સ્થાનિક સ્વરાજની ચુંટણી અન્વયે જે તે વિસ્તારના ગુજરાત શોપ્સ એન્ડ એસ્ટાબ્લીશમેન્ટસ (રેગ્યુલેશન ઓફ એમ્પ્લોયમેન્ટ એન્ડ કંડીશન્સ ઓફ સર્વિસ) એકટ -2019 હેઠળ નોંઘાયેલ સંસ્થાઓના શ્રમયોગીઓ-કર્મચારીઓ પોતાના મતાધિકારનો ઉપયોગ કરી શકે તે માટે આ દિવસે ચૂંટણી હેઠળના સમગ્ર વિસ્તારમાં વૈકલ્પિક વ્યવસ્થા તરીકે આવા કર્મચારીઓ-કામદારોને મતદાન માટે વારાફરતી ત્રણ કલાકની ખાસ રજા આપવામાં આવે અથવા જે દિવસે અઠવાડિક રજા હોય તે દિવસે સંસ્થાઓ ચાલુ રાખીને અવેજીમાં-બદલીમાં મતદાનના દિવસે રજા આપવામાં આવે તેવી વ્યવસ્થા કરવાની રહેશે તેમ મદદનીશ શ્રમ આયુકતએ જણાવ્યું છે.