ચીન તરફથી આ ચેતવણી એવા સમયે આવી છે જ્યારે એવા અહેવાલો છે કે ટ્રમ્પ વહીવટીતંત્ર ઘણા દેશો પર દબાણ કરી રહ્યું છે કે જો તેઓ અમેરિકા પાસેથી ટેરિફ મુક્તિ ઇચ્છે છે, તો તેમણે ચીન સાથે વેપાર મર્યાદિત કરવો પડશે.

રાષ્ટ્રપતિ ડોનાલ્ડ ટ્રમ્પે વિશ્વભરમાં 10 ટકા સુધીના સમાન ટેરિફ લાદ્યા છે, પરંતુ ચીન માટે આ દર 245 ટકા સુધી વધી ગયો છે. જવાબમાં, બેઇજિંગે પણ અમેરિકાથી આવતા ઉત્પાદનો પર 125 ટકા સુધીની ડ્યુટી લાદી છે. અમેરિકાની આ નીતિ હવે વૈશ્વિક વેપારને સંકટમાં મૂકી રહી છે અને મંદીની ભીતિ પણ વધી રહી છે.

ચીનના વાણિજ્ય મંત્રાલયે એક નિવેદન જારી કરીને કહ્યું કે, જો કોઈ દેશ ચીનના હિતોને અવગણીને અમેરિકા સાથે મોટો સોદો કરે છે, તો આવા વલણથી આખરે બંને પક્ષોને નુકસાન થશે.

બેઇજિંગે અમેરિકા પર તમામ વેપાર ભાગીદારો પર ટેરિફ લાદવાનો અને પ્રતિવાહી ટેરિફની વાતો કરીને તેમને ધમકી આપવાનો આરોપ મૂક્યો છે. મંત્રાલયે સ્પષ્ટપણે જણાવ્યું હતું કે ચીન તેના અધિકારોનું રક્ષણ કરવા સક્ષમ છે અને આ લડાઈ અંત સુધી લડશે.

જોકે, અમેરિકાના રાષ્ટ્રપતિ ડોનાલ્ડ ટ્રમ્પ કહે છે કે અમેરિકા અને ચીન વચ્ચે વાતચીત ચાલી રહી છે. તેમણે વ્હાઇટ હાઉસ ખાતે પત્રકારોને જણાવ્યું કે હા, અમે ચીન સાથે વાત કરી રહ્યા છીએ. મને લાગે છે કે અમે ચીન સાથે ખૂબ જ સારો સોદો કરવા જઈ રહ્યા છીએ.

પરંતુ ચીન તરફથી હજુ સુધી આ વાતચીતની કોઈ પુષ્ટિ થઈ નથી. તેનાથી વિપરીત, બેઇજિંગે અમેરિકાની નીતિઓને એકપક્ષીય અને સંરક્ષણવાદી ગણાવી છે અને ચેતવણી આપી છે કે તે વિશ્વને જંગલના કાયદા તરફ ધકેલી દેશે.