વાડી માલિક દ્વારા સેઢા પર ઝટકા મશીન મુકાયું હોવાથી વીજ આંચકો લાગ્યાનું અનુમાન

જામનગર જિલ્લાના લાલપુર તાલુકાના નવાણિયા ગામમાં એક વાડીના શેઢે થી ૩૫ થી ૪૦ વર્ષની વયના અજાણ્યા પુરુષનો મૃતદેહ સાંપડ્યો છે. વાડી ના શેઢે વીજ પ્રવાહ ચાલુ હોવાથી વિજ આંચકો લાગવાના કારણે મૃત્યુ નીપજ્યાનું અનુમાન કરાયું છે.

આ બનાવની વિગત એવી છે કે લાલપુર તાલુકાના નવાણિયા ગામમાં રહેતા અને ખેતી કામ કરતા જીવાભાઇ હમીરભાઇ ચાવડા નામના ખેડૂતે મેઘપર પોલીસને જાણ કરી હતી કે પોતાની વાડી ના શેઢે ૩૫ થી ૪૦ વર્ષની વયના અજાણ્યા પુરુષનો મૃતદેહ પડ્યો છે.

જે માહિતી ના આધારે મેઘપરના એ.એસ.આઈ.વી.સી. જાડેજા બનાવનાર સ્થળે પહોંચી ગયા હતાઝ અને અજ્ઞાત પુરુષના મૃતદેહનો કબ્જો સંભાળ્યો હતો. મૃતકે પોતાના જમણા હાથની કલાઈમાં હનુમાન નું ટેટુ ત્રોફાવેલું હતું, જ્યારે બંને પગમાં કાળા કલરના બુટ પહેરેલા હતા.

વાડીના શેઢે ખેડૂત દ્વારા કાંટાળી તારમાં ઝટકા મશીન મૂક્યું હોવાથી મૃતક ને વિજ આંચકો લાગ્યો હોવાના કારણે મૃત્યુ થયું હોવાનું અનુમાન કરાયું છે. સમગ્ર મામલે પોલીસ દ્વારા તપાસ કરવામાં આવી રહી છે, જયારે મૃતક ની ઓળખ કરવા માટે મૃતદેહને જામનગરની જી.જી. હોસ્પિટલ ના કોલ્ડ રૂમમાં રાખવામાં આવ્યો છે.