રાજકોટ મ્યુનિસિપલ કમિશનરએ શાક માર્કેટના થડાનું ભાડું બમણું કરવા તેમજ સફાઈ ચાર્જ અને જીએસટી અલગ વસૂલવા દરખાસ્ત કરી છે, હાલ મહિને ૫૦૦ વસુલાઇ છે તેના બદલે ૧૫૦૦ વસૂલવા સુચવ્યું છે. આવતીકાલે મળનારી સ્ટેન્ડિંગ કમિટીની મિટિંગમાં આ અંગે નિર્ણય થશે.

હાલ લીઝ ચાર્જ પર ૧૮ ટકા જીએસટી વસુલવામાં આવે છે

વિશેષમાં મ્યુનિ.કમિશનરે દરખાસ્તમાં જણાવ્યું છે કે, રાજકોટ મહાનગરપાલિકા હસ્તક શહેરમાં જુદી-જુદી જગ્યાએ આવેલ શાક માર્કેટ તથા ફ્લાવર માર્કેટ તેમજ ખડપીઠમાં આવેલ થડા, ઓટા, સ્ટોલ, વખાર, દુકાન ઇત્યાદિનું માસિક ભાડું લીઝ ચાર્જ હાલ રૂ.૫૦૦ વસુલવામાં આવે છે. આ ભાડા પર વખતો વખત લાગુ પડતો વેરો ભરપાઇ કરવાની જવાબદારી ફાળવણીદારની રહે છે. જે મુજબ હાલ લીઝ ચાર્જ પર ૧૮ ટકા જીએસટી વસુલવામાં આવે છે.​​​​​​​

લીઝ દરો રીવાઇઝ કરવા જરૂરી જણાય છે

આ તમામ માર્કેટની વહીવટી તથા સફાઇની કામગીરી માટે અલાયદો સ્ટાફ રોકાયેલ છે. ઉપરાંત માર્કેટ રીપેરીંગ-રીનોવેશન, લાઇટ બીલ તેમજ સીકયોરીટી વગેરે માટે પણ મોટા પ્રમાણમાં ખર્ચ થવા પામે છે. આ તમામ શાક માર્કેટોમાં સફાઇની કામગીરી સુ-વ્યસ્થિત થાય તે માટે દરેક તમામ માર્કેટોમાં સફાઇની કામગીરી માટે વધુ સફાઇ કર્મચારી મુકવાના થાય છે. આ તમામ ખર્ચના વધારાને ધ્યાને લેતા લીઝ દરો રીવાઇઝ કરવા જરૂરી જણાય છે.

નવ વર્ષમાં ભાડાના દરમાં કોઇ વધારો કરવામાં આવેલ નથી

તમામ માર્કેટના થડાના ભાડાના દર રૂ.૫૦૦ નિયત કરવામાં આવેલ છે જે છેલ્લા નવ વર્ષથી વસુલવામાં આવે છે અને નવ વર્ષમાં ભાડાના દરમાં કોઇ વધારો કરવામાં આવેલ નથી. તમામ શાક માર્કેટના નિભાવ ખર્ચ તેમજ કામદારોના મીનીમમ વેઇજીસમાં થયેલ વધારો ધ્યાને લેતા, તમામ માર્કેટના માસિક ભાડાના દરો રિવાઇઝડ કરી નવા દરો નક્કી કરવા યોગ્ય જણાય છે જેમાં હવેથી દર મહિને ભાડું રૂ.૧૦૦૦, માસિક સફાઈ ચાર્જ રૂ.૫૦૦ અને જીએસટી અલગ વસૂલવા સુચવ્યું છે.

મનપા હસ્તક ૮ માર્કેટ, ૭૫૦ થડા

-જ્યુબિલી શાક માર્કેટ

-લાખાજીરાજ શાક માર્કેટ

-ગુંદાવાડી શાક માર્કેટ

-ગોવિંદબાગ શાક માર્કેટ

-કોઠારીયા હુડકો શાકમાર્કેટ

-ભોજા ભગત શાક માર્કેટ

-લીલી સૂકી ખડ પીઠ

-રામનાથપરા ફ્લાવર માર્કેટ