આજે બાબા સાહેબ આંબેડકરની જન્મ જયંતિ છે ત્યારે દેશભરમાં ઉજવણી થઈ રહી છે. ત્યારે રાજકોટમાં પણ સિવિલ હોસ્પિટલ ચોક ખાતે આવેલ બાબા સાહેબ આંબેડકરની પ્રતિમા આગળ મોટી સંખ્યામાં લોકો એકત્ર થયા હતા અને કેક કાપી ઉજવણી કરી હતી. બાદમાં બાઈક રેલી નીકળી હતી. બાઈક રેલી રેસકોર્સ રિંગ રોડ પહોંચતા પોલીસ અને લોકો વચ્ચે ઘર્ષણ થયું હતું. મામલો થાળે પાડવા માટે ડીસીપી, એસીપી સહિતનો પોલીસ કાફલો દોડી ગયો હતો. 

શું કામ વિવાદ થયો?

રેસકોર્ષ રિંગ રોડ પર બાઈક રેલીમાં જોડાયેલા લોકોએ હોબાળો કર્યો હતો. પોલીસ કમિશ્નર કચેરી બહાર જિલ્લા પંચાયત ચોકમાં બબાલ થઈ હતી. ટ્રાફિક શાખાના કોન્સ્ટેબલે બાઇકમાં ધોકો અડાડતા ટોળું વિફર્યું હતું અને પોલીસને મારવા દોડ્યું હતું અને પોલીસ સાથે ઘર્ષણ કર્યું હતું. પોલીસ સાથે ઝપાઝપી થતા મામલો ઉગ્ર બની ગયો હતો.  જિલ્લા પંચાયત ચોકમાં પોલીસ કાફલો ખડકી દેવામાં આવ્યો છે. ટ્રાફિક પોલીસ દ્વારા બાઇક રેલીને અટકાવતા બબાલ થઈ હતી. ટ્રાફિક બ્રાન્ચના કોન્સ્ટેબલે બાઇકમાં ધોકો મારતા વિવાદ થયો હતો. રેલી દરમિયાન રસ્તો બાનમાં લીધો હતો. 

​​​​​​​