જ્યારે ક્વોન્ટમ ફિઝિક્સ અને લેસર ટેકનોલોજી એક ડગલું આગળ વધે છે, ત્યારે દૃષ્ટિ ફક્ત જોવા પૂરતી મર્યાદિત રહેતી નથી, તે ભવિષ્યમાં ડોકિયું કરવાનું શરૂ કરે છે. હવે કલ્પના કરો કે તમારા મોબાઇલ ફોન જેવું ઉપકરણ પરંપરાગત લેસર અથવા કેમેરાના ઉપયોગ વિના કિલોમીટર દૂર સ્થિત વસ્તુ પર લખેલા ફક્ત 3 મિમિ અક્ષરો વાંચી શકે છે. ચીનની યુનિવર્સિટી ઓફ સાયન્સ એન્ડ ટેકનોલોજીના સંશોધકોએ લેસર-આધારિત સિસ્ટમ વિકસાવી છે. જે 1.36 કિમીના અંતરે પણ વસ્તુઓની અત્યંત સૂક્ષ્મ વિગતો રેકોર્ડ કરે છે.

આ સામાન્ય કેમેરાની જેમ સીધી તસવીરો લેતું નથી, પરંતુ સપાટી પર અથડાયા પછી પ્રકાશ કેવી રીતે પાછો ફેંકાય છે તે સમજવા માટે 'સક્રિય તીવ્રતા ઇન્ટરફેરોમેટ્રી' ટેકનોલોજીનો ઉપયોગ કરે છે, આ એક શુદ્ધ ક્વોન્ટમ અસર છે, જે સામાન્ય ભૌતિકશાસ્ત્ર દ્વારા સમજાવી શકાતી નથી. સંશોધકો હવે આ સિસ્ટમમાં એઆઈને સમાવવાની યોજના પર કામ કરી રહ્યા છે. જેથી તસવીરોની ઓળખ અને વિશ્લેષણ વધુ સુધારી શકાય. આ સાથે, લેસર બીમનું નિયંત્રણ પણ વધુ સૂક્ષ્મ અને સચોટ બનાવવામાં આવી રહ્યું છે.

આ સિસ્ટમમાંથી ૮ ઇન્ફ્રારેડ લેસર બીમ દૂરના લક્ષ્ય પર મોકલવામાં આવે છે. પછી બે ટેલિસ્કોપ પાછા ફરેલા પ્રકાશની તીવ્રતા કેપ્ચર કરે છે. એક શક્તિશાળી કમ્પ્યુટર બંનેની તુલના કરે છે અને અલ્ટ્રા-હાઇ રિઝોલ્યુશન ઇમેજ બનાવે છે.

આ સિસ્ટમ ૩ મિમિ કદના અક્ષરો સ્પષ્ટ રીતે વાંચવામાં સક્ષમ છે જે પેન્સિલની ટોચ કરતાં પણ વધુ બારીક હોય છે. તેની સરખામણીમાં, એક સામાન્ય ટેલિસ્કોપ આ અંતરથી ૪૨ મીમી સુધીની વસ્તુઓને ઓળખી શકે છે, જેનો અર્થ છે કે આ ટેકનોલોજી ૧૪ ગણી વધુ સક્ષમ છે.

આ ટેકનોલોજી ફક્ત ચમકતા તારા પર જ નહીં, પણ રસ્તા, મકાન અથવા સરળ લખાણ જેવી વસ્તુઓ પર પણ નજર રાખી શકે છે, એટલે કે, તે ફક્ત ખગોળશાસ્ત્ર માટે જ નહીં પરંતુ જમીનની જરૂરિયાતો માટે પણ ક્રાંતિકારી બની શકે છે. જો કે, કેટલીક મર્યાદાઓ છે, આ માટે લક્ષ્ય સીધી દૃષ્ટિમાં હોવું અને લેસરના પ્રકાશથી પ્રકાશિત થવું જરૂરી છે. આથી, ગુપ્ત દેખરેખ અથવા છુપાયેલા જાસૂસીમાં તેની ભૂમિકા મર્યાદિત છે.