સખત ગરમીમાં ACની ખૂબ જ જરૂરિયાત અનુભવાય છે. સામાન્ય રીતે જે ઘરોમાં એસી લગાવેલા હોય ત્યાં લોકોને ગરમીનો અનુભવ થતો નથી. પરંતુ આ AC તેના તાપમાનને કારણે તમને બીમાર પણ કરી શકે છે. જો જોવામાં આવે તો લોકો ઘણીવાર ACનું તાપમાન ઘટાડે છે, જેના કારણે રૂમ ખૂબ જ ઠંડો થઈ જાય છે.

કેટલાક લોકો ACનું તાપમાન 18 અથવા 16 પર સેટ કરી દે છે, જેના કારણે રૂમ બરફ જેવો બની જાય છે. આ ઠંડક થોડા સમય માટે સારી લાગે છે પરંતુ ઘણા ઓછા લોકો જાણે છે કે તે સ્વાસ્થ્ય માટે જોખમી હોઈ શકે છે. હેલ્થ એક્સપર્ટ્સનું કહેવું છે કે જો ACનું તાપમાન 20થી નીચે રાખવામાં આવે તો તે રૂમમાં હાજર લોકોને બીમાર કરી શકે છે. ચાલો જાણીએ કે જો ACનું તાપમાન 20થી નીચે આવે તો શું નુકસાન થઈ શકે છે.

પ્રકાશિત થયેલા એક અહેવાલમાં જણાવાયું છે કે જે વ્યક્તિ એવા રૂમમાં રહે છે જ્યાં ACનું તાપમાન 20 ની નીચે છ કલાકથી વધુ સમય સુધી રહે છે તેની ત્વચામાં ભેજ ઘટી જાય છે. ખરેખર ACનું ઓછું તાપમાન ત્વચામાંથી ભેજને શોષી લે છે અને ત્વચામાંથી તેલ નીકળવા લાગે છે. જેના કારણે ચહેરા પર કરચલીઓ, પિમ્પલ્સ અને ખીલ જેવી સમસ્યાઓ દેખાવા લાગે છે.

જો રૂમનું AC 20થી નીચે ચાલતું હોય તો તે રૂમમાં ભેજના અભાવે સ્વાસ્થ્ય સબંધી ખતરો વધી જાય છે. જેમાં નાકમાં એલર્જીનું જોખમ વધી જાય છે.

જ્યારે રૂમમાં તાપમાન આટલું ઓછું હોય છે, ત્યારે માત્ર શરીરમાં ભેજ ઓછો થતો નથી, પરંતુ આંખોમાં ભેજ પણ ઓછો થવા લાગે છે. આના કારણે રૂમની અંદરની સૂકી હવા આંખોને સૂકી બનાવે છે અને સૂકી આંખોની સમસ્યા ઉભી થાય છે.