મહારાષ્ટ્રના મુખ્યમંત્રી એકનાથ શિંદેના પુત્ર સાંસદ શ્રીકાંત શિંદે પર મધ્યપ્રદેશના ઉજ્જૈનમાં મહાકાલ મંદિરના નિયમો તોડવાનો આરોપ છે. શ્રીકાંત શિંદે પર પ્રતિબંધ હોવા છતાં તેમની પત્ની અને બે સાથીઓ સાથે ગર્ભગૃહમાં જઈને પૂજા કરવાનો આરોપ છે.

મહાકાલના દર્શન માટે ઉજ્જૈન આવેલા શ્રીકાંત શિંદે અને તેના સાથીઓના મંદિરના ગર્ભગૃહમાં પ્રવેશતા ફોટા અને વીડિયો સામે આવ્યા છે. માહિતી અનુસાર, સાંસદ શ્રીકાંત શિંદે, તેમની પત્ની અને અન્ય બે લોકો  સાંજે 5.38 વાગ્યે ગર્ભગૃહમાં પ્રવેશતા જોવા મળ્યા હતા. આ લોકો એ મહાકાલની શોભા દરમિયાન શિવલિંગ પાસે બેસીને પૂજા કરી છે. એ વીડિયો સોશિયલ મીડિયા પર પણ વાયરલ થઈ રહ્યો છે.

જ્યારે આ મામલો વધવા લાગ્યો ત્યારે વહીવટીતંત્રે કહ્યું કે તેઓ આ મામલે યોગ્ય કાર્યવાહી કરશે અને જો કોઈ દોષિત સાબિત થશે તો તેને છોડવામાં આવશે નહીં.

નિયમો અનુસાર છેલ્લા એક વર્ષથી મહાકાલ મંદિરના ગર્ભગૃહમાં કોઈપણ ભક્તના પ્રવેશ પર પ્રતિબંધ છે. અહીં ફક્ત પૂજારીઓને જ પ્રવેશ આપવામાં આવે છે. ભક્તો માટે એવા નિયમો છે કે તેઓ મહાકાલેશ્વર શિવલિંગના 50 ફૂટ દૂરથી દર્શન કરી શકે છે. કહેવામાં આવી રહ્યું છે કે 4 મહિનામાં આ ચોથી વખત છે જ્યારે કોઈ VIPએ મંદિરના નિયમો તોડ્યા છે.