રેસકોર્સ રિંગ રોડ પર આવેલ વ્રજ હોટેલમાં લાઈનબોય સહિત બે શખસોએ ઘૂસી ધમાલ મચાવી હોટેલના મેનેજર સાથે ધોલધપાટ કરી હતી. બનાવને પગલે મેનેજરે ફરિયાદ કરતાં પ્ર. નગર પોલીસે સીસીટીવીમાં કેદ પોલીસપુત્ર સહિત બંને સામે એનસી ગુનો નોંધી બંનેની ઝડપી લઇ કાયદેસરની કાર્યવાહી કરી હતી.
જાણવા મળતી વિગતો મુબજ, 80 ફૂટ રોડ પર સત્યમ પાર્કમાં રહેતા અને રેસકોર્સ રિંગ રોડ પર હોટેલ વ્રજ રેસકોર્ષમાં મેનેજર તરીકે નોકરી કરતા કલ્પેશભાઈ નરેન્દ્રભાઈ ગઢિયાએ પ્ર.નગર પોલીસ મથકમાં નોંધાવેલી ફરિયાદમાં આરોપી તરીકે હરિજિતસિંહ જાડેજા અને હરિસ ફિરોજ બતાળાનું નામ આપ્યું છે.ફરિયાદમાં જણાવ્યું હતું કે, બુધવારે રાત્રીના તે અને તેનો સ્ટાફ હોટેલે હતો દરમિયાન બે અજાણ્યા શખસ હોટેલમાં ધસી આવ્યા હતા. દરમિયાન એક શખસે હોટેલના કાઉન્ટર પર આવી હોટેલના રજિસ્ટર સહિતની વસ્તુઓની માંગ કરી હતી જે નહીં આપતા ધમાલ મચાવી હતી અને સ્ટાફ સાથે ધોલધપાટ શરૂ કરી હતી.દરમિયાન પોલીસમાં ફોન કરવાનું કહેતા બન્ને નાસી ગયા હતાં.
બાદમાં મેનેજરે પ્ર. નગર પોલીસ મથકે પહોંચી બનાવ અંગે જાણ કરતાં પીએસઆઇ બેલીમ, હેડ કોન્સ્ટેબલ ધર્મેશ ડાંગરે સીસીટીવીના આધારે તપાસ કરતાં હોટેલમાં ધમાલ મચાવનાર પોલીસ હેડક્વાર્ટર્સમાં રહેતો હરિજિતસિંહ સહદેવસિંહ જાડેજા અને નાનામવા રોડ પર લક્ષ્મીનગરમાં રહેતો હરિશ ફિરોજભાઈ બતાળા હોવાનું બહાર માલુમ પડયું હતું.બાદમાં મેનેજરની ફરિયાદ પરથી બંને સામે ગુનો એનસી ગુનો નોંધી બંનેની ધરપકડ કરી કાયદેસરની કાર્યવાહી કરી હતી.