શહેરમાં હજુ ગઈકાલે જ ગુનાખોરી આચરનારા શખસોને કાયદાનું ભાન કરાવવા માટે તેના મકાનો ઉપર પોલીસે બુલડોઝર ફેરવી કડૂસલો બોલાવી દીધો હતો જેના કાટમાળ પણ હજુ હટ્યા નથી ત્યાંજ શેરીમાં સ્કૂટર ધીમે ચલાવવા બાબતે યુવકે ઠપકો આપતા બે શખસોએ છરીના આડેધડ ઘા ઝીંકી હત્યાનો પ્રયાસ કર્યો હતો. આ જોતા હજુએ પોલીસનો ભય ગુનેગારો પર પેઠો નથી એ આ જીવલેણ હુમલાના બનાવોને જોતા સ્પષ્ટ પણે લાગી રહ્યું છે.

શહેરના અંકુર વિદ્યાલય મેઈન રોડ પર આવેલી ભોલેનાથ સોસાયટી શેરી નં-02માં રહેતા ઘુસાભાઇ ગીગાભાઇ જાદવ (ઉ.વ.35)ના ગઈકાલે રાત્રીના સાડા દશેક વાગ્યે ઘર પાસે ઉભા હતા ત્યારે મનીષ લોધા ત્યાંથી ઍક્સેસ સ્કૂટર લઈને પુરપાટ ઝડપે નીકળતા ઘુસાભાઈએ તેને ઉભો રાખી તું કેમ ગાડી સ્પીડમાં ચલાવે છે, અહીં શેરીમાં નાના બાળકો રમતા હોય છે, આથી મનીષએ તું અમને કહેવા વાળો કોણ ? આખી ગાળો આપી ઝગડો કરવા લાગ્યો હતો. તેને ગાળો આપવાની ના પાડતા વધુ ઉશ્કેરાઈ તેને ફોન કરી માસીસાઈ ભાઈ ઋત્વિક ઉર્ફે દાદુ લોધાને ફોન કરી બોલાવતા એ પણ ત્યાં આવી ગયો હતો અને બંને ઝગડો કરવા લાગ્યા હતા. ઋત્વિકે ઘુસાભાઈને પકડી રાખ્યા હતા અને મનીષે નેફામાંથી છરી કાઢી આડેધડ ઘા ઝીકવા લાગતા યુવકને પીઠના ભાગે ગંભીર જીવલેણ ઇજા થતા લોહી લુહાણ થયા હતા. દેકારો થતા આસપાસના લોકો ભેગા થઇ જતા બંને શખ્સો ભાગી ગયા હતા. ઘવાયેલા યુવકને અર્ધબેભાન હાલતમાં સિવિલ હોસ્પિટલમાં ખસેડવામાં આવ્યા હતા. જ્યાં તબીબે જીવલેણ ઇજા હોવાનું જણાવ્યું હતું. બનાવની જાણ હોસ્પિટલ ચોકીના સ્ટાફે માલવીયા નગર પોલીસને જાણ કરતા પોલીસે યુવકના પત્ની સોનલબેન (ઉ.વ.32)એ મનીષ લોધા અને ઋત્વિક ઉર્ફે દાદુ લોધા સામે ફરિયાદ નોંધાવતા હત્યાના પ્રયાસ સહિતની કલમ હેઠ ગુનો નોંધી આરોપીની શોધખોળ હાથ ધરી છે.