અમેરિકાના પ્રમુખ ડોનાલ્ડ ટ્રમ્પે વધુ એક ટેરિફ બોમ્બ ફોડતાં વિદેશમાંથી આયાત થતા સ્ટીલ ઉપર ટેરિફ બમણો કરવાની જાહેરાત કરી દીધી. હાલમાં સ્ટીલની આયાત પર ટેરિફ દર 25 ટકા છે જે હવે વધારીને 50 ટકા કરવામાં આવ્યો છે. તેમણે કહ્યું કે આ ટેરિફનો હેતુ અમેરિકાના સ્ટીલ ઉદ્યોગને પ્રોત્સાહન આપવાનો છે. પેન્સિલવેનિયામાં યુએસ સ્ટીલના મોન વેલી વર્ક્સ-ઇર્વિન પ્લાન્ટમાં સંબોધન કરતા ડોનાલ્ડ ટ્રમ્પે કહ્યું કે ટેરિફ વધારો સ્થાનિક સ્ટીલ ઉત્પાદકોને સુરક્ષિત કરશે અને અમેરિકામાં ઉત્પાદનને મજબૂત બનાવશે.

અહેવાલ મુજબ અમેરિકન પ્રમુખ ટ્રમ્પે કહ્યું, "અમે સ્ટીલ આયાત પર ટેરિફ 25% વધારવા જઈ રહ્યા છીએ. અમે અમેરિકામાં સ્ટીલ પર ટેરિફ 25% થી 50% સુધી લાવવા જઈ રહ્યા છીએ, જેથી અમારા દેશમાં સ્ટીલ ઉદ્યોગ વધુ સુરક્ષિત બનશે." ચીન પર કટાક્ષ કરતા ટ્રમ્પે કહ્યું કે અમેરિકાનું ભવિષ્ય "શાંઘાઈના હલકી ગુણવત્તાવાળા સ્ટીલ" પર આધાર રાખવાને બદલે "પિટ્સબર્ગની તાકાત અને ગૌરવ" થી નિર્માણ કરવા પર આધારિત હોવું જોઈએ.

આ ઉદ્યોગોને અસર થશે

જો પ્રસ્તાવિત ટેરિફ વધારો લાગુ કરવામાં આવશે તો તે સ્ટીલ પર ભારે નિર્ભર ઉદ્યોગોના ખર્ચમાં વધારો કરી શકે છે, જેમાં હાઉસિંગ, ઓટોમોટિવ અને બાંધકામ ક્ષેત્રોનો સમાવેશ થાય છે. ટ્રમ્પ દ્વારા મજબૂત વેપાર સંરક્ષણ માટે સતત હાકલ વચ્ચે આ જાહેરાત કરવામાં આવી છે. સરકારી ડેટા અનુસાર, 2018 માં સ્ટીલ પર પહેલી વાર ટેરિફ લાદવામાં આવ્યા ત્યારથી અમેરિકામાં સ્ટીલ ઉત્પાદનોના ભાવમાં લગભગ 16 ટકાનો વધારો થયો છે.]

સ્ટીલ ઉત્પાદનોના ભાવમાં ૧૬ ટકાનો વધારો

ટ્રમ્પ શુક્રવારે પેન્સિલવેનિયાના વેસ્ટ મિફલિનમાં યુએસ સ્ટીલના મોન વેલી વર્ક્સ-ઇર્વિન પ્લાન્ટમાં જાપાનની નિપ્પોન સ્ટીલ દ્વારા રોકાણની જાહેરાત કરવા માટે બોલી રહ્યા હતા. સરકારના ઉત્પાદક ભાવ સૂચકાંક અનુસાર, ટ્રમ્પ રાષ્ટ્રપતિ બન્યા પછી સ્ટીલ ઉત્પાદનોના ભાવમાં લગભગ 16 ટકાનો વધારો થયો છે.

હું સારો રહ્યો પણ ચીને પીઠમાં છરો ભોંક્યો

અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે કહ્યું કે તેઓ હવે ચીન સાથે વેપાર પર "મિસ્ટર નાઇસ ગાય" રહેશે નહીં, તેમણે સોશિયલ મીડિયા પોસ્ટમાં જાહેર કર્યું કે ચીને યુનાઇટેડ સ્ટેટ્સ સાથેનો કરાર તોડી નાખ્યો છે. જોકે, ટ્રમ્પે ઓવલ ઓફિસમાં ફરીથી કહ્યું કે તેઓ ચીનના રાષ્ટ્રપતિ શી જિનપિંગ સાથે વાત કરશે અને આશા છે કે અમે તેના પર કામ કરીશું, જ્યારે તેમણે હજુ પણ ભાર મૂક્યો હતો કે ચીને કરારનું ઉલ્લંઘન કર્યું છે. ટ્રમ્પ કયા સોદાનો ઉલ્લેખ કરી રહ્યા હતા તે સ્પષ્ટ નહોતું. પરંતુ તેમણે તાજેતરમાં વ્યક્ત કરેલી અપેક્ષાઓથી ઘણી દૂરની વાત કહી, જ્યારે તેમણે ચીની માલ પરનો ૧૪૫ ટકાનો ટેરિફ ૯૦ દિવસ માટે ઘટાડીને ૩૦ ટકા કર્યો. ચીને પણ અમેરિકન માલ પરનો ટેક્સ ૧૨૫ ટકાથી ઘટાડીને ૧૦ ટકા કર્યો.