શહેરના રૈયા રોડ પર ટ્રિનિટી ટાવરમાં રહેતા અને પડધરીમાં પીએમ આંગણીયા પેઢી ચલાવતા પરાગભાઇ ચંદ્રકાંતભાઈ ચગ (ઉ.વ.30) નામના યુવકે પડધરી પોલીસ મથકમાં અજાણ્યા શખસ સામે પોતાની એક્ટિવા ચોરી કરી ગયાની ફરિયાદ નોંધાવી છે. એક્ટિવાની ડીક્કીમાં ગ્રાહકને આપવાના રૂ. 6.90 લાખ પણ રાખવામાં આવ્યા હતા પોલીસે આંગણિયા પેઢીના સંચાલકની ફરિયાદ પરથી અજાણ્યા શખસ સામે ગુનો નોંધી તપાસ હાથ ધરી છે.

ફરિયાદમાં પરાગભાઇએ જણાવ્યું છે કે, તા.24ના રાત્રીના સાડા આઠેક વાગ્યે મોરબી મારી ઓફિસે હતો ત્યારે મારો કર્મચારી શકીલ સુલતાનભાઈ દલ મારી એક્ટિવા પ્લેઝર જીજે 03-એફપી-899 નંબરની લઇ ગ્રાહકને આપવાના રૂ.6.90 લાખ ડીક્કીમાં રાખી આપવા જતો હતો ત્યારે રસ્તામાં તેના મિત્રની રઝવી મોબાઈલ નામની દુકાને મોબાઈલનું રિચાર્જ કરાવવા માટે ઉભો હતો દરમિયાન એક્ટિવાની ચાવી પણ તેમાં જ હોવાથી કોઈ અજાણ્યો શખ્સ એક્ટિવા પ્લેઝર લઇ નાસી છૂટ્યો હતો. રિચાર્જ કરાવી શકીલ પરત આવતા એક્ટિવા જોવા ન મળતા મિત્રની મોબાઈલની દુકાનના સીસીટીવી ચેક કરાવ્યા હતા તેમાં કોઈ અજાણ્યો શખસ સ્કૂટર હંકારી લઇ જતો જોવા મળ્યો હતો. મિત્રો સાથે મળી તેની શોધખોળ કરવા છતાં મળી આવ્યો ન હતો. અંતે પોલીસમાં ફરિયાદ નોંધાવી હતી. પોલીસે સીસીટીવી ફૂટેજના આધારે શખસની શોધખોળ હાથ ધરી છે.