અમેરિકાનું ગ્રીન કાર્ડ અથવા કાયમી નિવાસ કાર્ડ પ્રવાસીઓને યુનાઇટેડ સ્ટેટ્સમાં કાયમી ધોરણે કામ કરવા અને રહેવાની મંજૂરી આપે છે. જો કે, ઉપરાષ્ટ્રપતિ જે.ડી. વેન્સે આ વાત પર ભાર મૂકતા કહ્યું કે ગ્રીન કાર્ડ હોવાથી અનિશ્ચિત મુદત માટે રહેવાની ગેરંટી મળતી નથી.

ડોનાલ્ડ ટ્રમ્પ જે દિવસથી અમેરિકાની સત્તામાં પાછા ફર્યા છે, તે દિવસથી માત્ર અમેરિકા જ નહીં પરંતુ વિશ્વભરમાં ખળભળાટ મચી ગયો છે. ટ્રમ્પની ટેરિફ પોલિસીની સાથે સાથે ઇમિગ્રેશનના નિયમોએ સમગ્ર વિશ્વમાં ઉથલપાથલ મચાવી દીધી છે. ટ્રમ્પના ફરીથી સત્તામાં આવ્યા બાદથી અમેરિકી વહીવટીતંત્ર ઇમિગ્રેશનના નિયમોને લઈને ખૂબ જ કડક વલણ અપનાવી રહ્યું છે. અમેરિકાએ હમણાં જ હજારો ગેરકાયદેસર પ્રવાસીઓને ડિપોર્ટ કર્યા છે અને તેમાં સેંકડો ભારતીયો પણ સામેલ છે. આ દરમિયાન અમેરિકી વહીવટીતંત્રે અમેરિકામાં રહેતા પ્રવાસીઓ (Immigrants) માટે એક ચેતવણી જારી કરી છે, જેણે લાખો-કરોડો લોકોની ચિંતા વધારી દીધી છે.

અમેરિકી વિભાગે સત્તાવાર સોશિયલ મીડિયા એકાઉન્ટ પર જારી કરી ચેતવણી

અમેરિકી સરકારના વિભાગે પોતાના સત્તાવાર સોશિયલ મીડિયા એકાઉન્ટ પર એક પોસ્ટ કર્યું છે. વિભાગે આ પોસ્ટમાં લખ્યું છે, "વિઝા જારી થયા પછી યુ.એસ. વિઝા સ્ક્રીનિંગ બંધ થતું નથી. અમે વિઝા હોલ્ડરોની સતત તપાસ કરીએ છીએ જેથી એ સુનિશ્ચિત થઈ શકે કે તેઓ અમેરિકાના તમામ કાયદાઓ અને ઇમિગ્રેશન નિયમોનું પાલન કરે છે. જો કોઈ પણ વિઝા હોલ્ડર અમેરિકાના તમામ કાયદાઓ અને ઇમિગ્રેશનના નિયમોનું પાલન કરતું નથી, તો અમે તેમના વિઝા રદ કરી દઈશું અને તેમને ડિપોર્ટ કરી દઈશું." એટલે કે જે લોકોને અમેરિકામાં કામ કરવા અને રહેવા માટે વિઝા મળી પણ ગયા છે, તેઓ સતત અમેરિકી વહીવટીતંત્રના રડાર પર જ રહેશે.

અમેરિકામાં ઇમિગ્રન્ટ્સ માટે નિયમો અને કાયદા

અમેરિકામાં રહેતા ઇમિગ્રન્ટ્સ માટે કેટલાક નિયમો અને કાયદાઓનું પાલન કરવું જરૂરી છે, જેથી તેઓ કાયદેસર રીતે ત્યાં રહી શકે અને કોઈ સમસ્યાનો સામનો ન કરવો પડે. અહીં કેટલાક મહત્વપૂર્ણ નિયમો અને કાયદાઓ જણાવ્યા છે:

- તમામ સંઘીય, રાજ્ય અને સ્થાનિક કાયદાઓનું પાલન કરો: અમેરિકામાં રહેતા દરેક વ્યક્તિએ દેશના તમામ સ્તરે લાગુ પડતા કાયદાઓનું પાલન કરવું આવશ્યક છે.

- સંઘીય, રાજ્ય અને સ્થાનિક આવકવેરો ચૂકવો: ઇમિગ્રન્ટ્સ પણ અમેરિકાના નાગરિકોની જેમ જ આવકવેરો ચૂકવવા માટે જવાબદાર છે.

- જો તમે 18 થી 26 વર્ષની વય વચ્ચેના પુરુષ છો, તો સિલેક્ટિવ સર્વિસ (યુ.એસ. સશસ્ત્ર દળ) સાથે નોંધણી કરો: આ એક ફરજિયાત પ્રક્રિયા છે.

- તમારી ઇમિગ્રેશન સ્થિતિ જાળવી રાખો: તમારી પાસે જે વિઝા અથવા અન્ય ઇમિગ્રેશન સ્ટેટસ છે, તેના નિયમોનું પાલન કરવું જરૂરી છે.

- તમારા કાયમી નિવાસીની સ્થિતિનો પુરાવો હંમેશાં તમારી સાથે રાખો: ગ્રીન કાર્ડ અથવા અન્ય સંબંધિત દસ્તાવેજો હંમેશાં તમારી પાસે હોવા જોઈએ.

- જ્યારે પણ તમે ક્યાંય જાઓ, 10 દિવસની અંદર તમારું સરનામું ઓનલાઈન બદલો અથવા USCISને લેખિતમાં આપો: તમારા સરનામામાં કોઈપણ ફેરફારની જાણ કરવી જરૂરી છે.