રાજકોટ, લોધિકા અને પડધરી તાલુકાના ૧૮૦ ગામોનું કાર્યક્ષેત્ર ધરાવતા રાજકોટના બેડી માર્કેટ યાર્ડમાં દર વર્ષે માવઠા તેમજ ચોમાસા દરમિયાન ખુલામાં પડેલી જણસીઓ પલળી જતા લાખો રૂપિયાનું નુકસાન થતું હોય આ વર્ષે તા.૨૧થી ૨૭ મે દરમિયાન વરસાદની આગાહીને લઇને એલર્ટ જાહેર કરાયું છે.

રાજકોટના બેડી માર્કેટ યાર્ડમાં કામકાજ કરતાં વેપારીઓ, દલાલો તેમજ ખેતપેદાશ વેચાણ અર્થે બહારગામથી આવતાં ખેડૂતો જોગ પરિપત્ર પ્રસિધ્ધ કરાયો છે કે, હવામાન ખાતા દ્વારા આગામી તા.૨૧ થી ૨૭ મે દરમ્યાન આપવામાં આવેલી વરસાદની આગાહી ધ્યાને લઈ કોઈપણ ખેતપેદાશ માર્કેટ યાર્ડમાં ખુલ્લા મેદાનમાં કે વરસાદને કારણે પલળી જાય તેમ ઉતારવી નહિ તેમજ અગાઉ ઉતારી હોય તેવી જણસીને ઢાંકીને સલામત રીતે રાખવાની રહેશે. પ્લેટફોર્મમાં જ તમામ ખેતપેદાશો ઉતારવાની રહેશે, પ્લેટફોર્મમાં જગ્યા ન હોય તો જે તે દલાલ કે વેપારીની દુકાને અથવા તો ગોડાઉને સલામત રીતે ખેત પેદાશ ઉતારવાની રહેશે. વાહનોમાં આવતી ખેતપેદાશો અને પાલ સલામત રીતે ઢાંકીને ક્રમવાર વાહનો ઉભા રાખવાના રહેશે. આ સુચનાઓનું સલામતીના કારણોસર અચૂક પાલન કરવા પરિપત્રમાં જણાવ્યું છે.