હીરાસર એરપોર્ટ ખાતે પેસેન્જર ભરવા બાબતે અનેક વખત ટેક્સી ડ્રાઈવરો વચ્ચે માથાકૂટ થતી હોવાનું સામે આવ્યું છે ત્યારે વધુ એક વખત એરપોર્ટમાં કોન્ટ્રાકટ ધરાવતી ખાનગી કંપનીના ટેક્સી ડ્રાઈવર અને અન્ય ટેક્સી ડ્રાઈવર વચ્ચેની બબાલ સામે આવી છે. એરપોર્ટમાં ટેક્સીનો કોન્ટ્રાકટ ધરાવતી બઝ વે કંપનીના ડ્રાયવર વિક્રમસિંહ ઉપરાંત બામણબોરના સકુંતલાબેન અને પરમીલાબેન રાયજાદાના નામ સાથે ખાનગી ટેક્સી ચાલક જયદીપ અસવારે એસોસિએશનના કેટલાક ડ્રાઇવરોને સાથે રાખી પોલીસ કમિશનરને અરજી આપી છે. જેમાં જણાવ્યું છે કે, હીરાસર એરપોર્ટ ખાતેથી પેસેન્જર ભરવા બાબતે વિક્રમસિંહ અવાર નવાર અમારા ખાનગી ટેક્સી ડ્રાયવર એસો.ના સભ્યો સાથે ગાળાગાળી કરી, જાનથી મારી નાખવાની ધમકીઓ આપે છે તેમજ અવાવરું સ્થળે લાકડી, ધોકા, પાઇપ લઈને મારવા દોડે છે. એકાદ વર્ષ પૂર્વે સકુંતલાબેન અને પરમીલાબેન રાજાયદા નામની મહિલાએ અમને લાલચ આપી હતી કે, તમને હીરાસર એરપોર્ટ ખાતે સ્વતંત્ર ટેબલ અપાવી દઈશું જેથી તમે ટેક્સી ડ્રાયવર એસો.ના સભ્યો સરળતાથી ધંધો કરી શકશો. જેના બદલામાં પૈસા દેવા પડશે તેવું જણાવતા અમે ટેક્સી ડ્રાયવર એસો. છેલ્લા આઠેક માસથી દર મહિને રૂ. 20 હજાર બંનેને ચૂકવતા હતા પણ છ માસમાં ટેબલ અપાવી દેવાનો વાયદો પૂર્ણ નહિ થતાં અમે પૈસા આપવાનું બંધ કરી દીધું હતું. જેથી બંને મહિલાઓ વિક્રમસિંહ સાથે મળી અમને ધાક ધમકીઓ આપતાં હતા. ઉલ્લેખનીય છે કે, બંને મહિલાઓને એરપોર્ટ સાથે કોઈ લેવા દેવા ન હોય ફક્ત આ પ્રકારે જ વચેટિયાની ભૂમિકામાં આવી પૈસા પડાવે છે તેવો પણ આક્ષેપ કરવામાં આવ્યો છે. ઉપરાંત એરપોર્ટ પોલીસની કાર્યવાહીને પણ શંકાના દાયરામાં જણાવી યુવકે બંને મહિલાઓ સહીત ત્રણેય શખ્સોં વિરુદ્ધ કાર્યવાહી કરવા પોલીસ કમિશ્નરને કરેલી રજુઆતમાં જણાવ્યું છે.