જામનગરની સરકારી જી.જી. હોસ્પિટલના રેડિયોલોજી વિભાગમાંથી એક યુવાન અર્ધબેભાન અવસ્થામાં મળી આવ્યો હતો. જેનું સારવાર દરમિયાન મૃત્યુ નીપજ્યું છે.

આ બનાવની વિગત એવી છે કે જામનગરની સરકારી જી.જી. હોસ્પિટલમાં રેડિયોલોજી વિભાગમાં આશરે ૩૫ વર્ષની વયનો એક યુવાન અર્ધબેભાન અવસ્થામાં મળી આવ્યો હતો. જેને આર.એમ.ઓ. દ્વારા ઇમરજન્સી વોર્ડમાં સારવાર માટે ખસેડવામાં આવ્યો હતો, જ્યાં તેને કિડનીની બીમારી હોવાથી સારવાર દરમિયાન મૃત્યુ નીપજ્યું હોવાનું જાહેર કરાયું હતું.

આ બનાવ અંગે પોલીસને જાણ કરાતાં સીટી બી. ડિવિઝનના પી.એસ.આઇ. આર.પી.અસારી જી.જી. હોસ્પિટલમાં દોડી ગયા હતા, અને મૃતદેહનો કબ્જો સંભાળી પોસ્ટ મોર્ટમ કરાવ્યું છે, જ્યારે તેની ઓળખ કરવા માટેની કાર્યવાહી હાથ ધરી છે.