હું મારી રીતે પગલુ ભરુ છું, કોઇનો વાંક નથી. પપ્‍પા હું તમને સાચવી ન શક્‍યો મને માફ કરજો, મારી દિકરીનું ધ્‍યાન રાખજો ચીઠી લખી શહેરના 150 ફુટ રીંગ રોડ પર જસરાજનગરમાં રહેતાં યુવકે ગળાફાંસો ખાઇ આપઘાત કરી લેતાં પરિવારમાં અરેરાટી મચી જવા પામી છે.

હોલમાં જ પતિને લટકતી હાલતમાં જોતા બુમાબુમ કરી

જાણવા મળ્‍યા મુજબ મવડી ૧૫૦ રીંગ રોડ પર ઉમિયા સર્કલ પાસે જસરાજનગર-૨માં રહેતાં ચેતનભાઇ હર્ષદભાઇ મોરીધરા (ઉ.વ.૩૭) નામના યુવાને વહેલી સવારે હોલમાં છત્તના હૂકમાં દોરી બાંધી ગળેફાંસો ખાઈ લીધો હતો. સવારે પત્ની જલ્પાબેન જાગીને રૂમમાં જોતા પતિ જોવા ન મળતા બહાર નીકળતા હોલમાં જ પતિને લટકતી હાલતમાં જોતા બુમાબુમ કરી મુકતા પરિવારજનો અને પડોશીઓ દોડી આવ્યા હતા અને કોઈએ 108ને જાણ કરતા ઇએમટીએ જોઈ તપાસી મૃત જાહેર કરતા પરિવારમાં કલ્પાંત સર્જાયો હતો. બનાવની જાણ તાલુકા પોલીસને થતા પોલીસ સ્ટાફ સ્થળ પર પહોંચી જરૂરી કાર્યવાહી કરી મૃતદેહને પીએમ માટે સિવિલ હોસ્પિટલએ ખસેડી જરૂરી કાર્યવાહી કરી હતી.

સંતાનમાં બે દિકરી 

આપઘાત કરનાર ચેતનભાઇ સેન્‍ટીંગ કામના કોન્‍ટ્રાક્‍ટ રાખી ગુજરાન ચલાવતાં હતાં. સંતાનમાં બે દિકરી છે. યુવાનએ ક્યાં કારણોસર પગલું ભર્યું પરિવારજનો પણ જાણતા ન હોય પોલીસે સ્યુસાઇડ નોટ કબ્જે કરી હતી તેમાં ચેતનભાઇએ હું મારી જાતે પગલુ ભરુ છું, કોઇનો વાંક નથી, પપ્‍પા હું તમને સાચવી ન શક્‍યો મને માફ કરજો, મારી દિકરીનું ધ્‍યાન રાખજો તેવું લખેલું છે. કારણ જાણવા પોલીસે તપાસ યથાવત રાખી છે.