અમદાવાદના નરેન્દ્ર મોદી સ્ટેડિયમમાં આજે IPL 2025 ની ફાઇનલ મેચ માત્ર ક્રિકેટનો જ નહીં, પરંતુ દેશભક્તિનો પણ અનોખો ઉત્સવ બની રહી છે. મેચ શરૂ થતા પહેલા અને ઇનિંગ્સ બ્રેક દરમિયાન યોજાયેલા કાર્યક્રમોએ દર્શકોના દિલ જીતી લીધા હતા.

​​​​​​​જાણીતા સંગીતકાર અને ગાયક શંકર મહાદેવને પોતાના દેશભક્તિના સૂર રેલાવીને સ્ટેડિયમમાં હાજર હજારો દર્શકોમાં જોશ ભર્યો હતો. તેમના ગીતોએ વાતાવરણને દેશપ્રેમથી ભરી દીધું હતું. આ ઉપરાંત 'કેસરી' ફિલ્મનું લોકપ્રિય ગીત 'તેરી મિટ્ટી' પર કલાકારો દ્વારા પ્રસ્તુત કરવામાં આવેલો ભાવપૂર્ણ નૃત્ય પણ આકર્ષણનું કેન્દ્ર બન્યો હતો. કલાકારોએ પોતાના ડાન્સ દ્વારા માતૃભૂમિ પ્રત્યેના પ્રેમ અને બલિદાનની ગાથાને જીવંત કરી હતી.

આ કાર્યક્રમમાં ક્રિકેટનો ઉત્સાહ દેશભક્તિના રંગમાં રંગાઈ ગયું હતું. નરેન્દ્ર મોદી સ્ટેડિયમમાં ઉપસ્થિત હજારો ચાહકોએ તાળીઓના ગડગડાટ અને ભારત માતા કી જયના નારા સાથે કલાકારો અને શંકર મહાદેવનને વધાવી લીધા હતા. આ અનોખા સંગમથી IPL ફાઇનલનો રોમાંચ વધુ ગાઢ બન્યો હતો.