રૂ. 3.15 લાખના મુદ્દામાલ સાથે ચાર ઝબ્બે

ખંભાળિયાથી આશરે 10 કિલોમીટર દૂર લાલપુર રોડ પરથી ગતરાત્રે પોલીસે જામનગરના દરેડ વિસ્તારમાં રહેતા ભરત દેવાયત કરમુર (ઉ. 22), કલ્યાણપુરના વીરપર ગામના કાર્તિક દેવાણંદ ચાવડા (ઉ. 20), કારણ વીરાભાઈ સોલંકી (ઉ. 20) અને જામનગરમાં પ્રણામી ટાઉનશિપ ખાતે રહેતા વિજય કેશુર ગોજીયા (ઉ. 20) નામના ચાર શખ્સોને એક્સ.યુ.વી. કારમાંથી વેચાણ અર્થે લઈ આવેલા વિદેશી દારૂની 42 બોટલ સાથે ઝડપી લીધા હતા.

આ પ્રકરણમાં પોલીસે રૂપિયા 15,372 ની કિંમતની વિદેશી દારૂની 42 બોટલ તેમજ રૂપિયા ત્રણ લાખની કિંમતની મોટરકાર સાથે સહી કુલ રૂપિયા 3,15,372 નો મુદ્દામાલ કબજે કરી, તમામની વિધિવત રીતે અટકાયત કરી હતી.

ખંભાળિયાના લાલપરડા ગામે માસુમ બાળકીનું મૃત્યુ

ખંભાળિયા તાલુકાના લાલપરડા ગામે રહેતા રવિભાઈ પીઠાભાઈ નંદાણીયા નામના 25 વર્ષના યુવાનની દોઢ વર્ષની પુત્રી કિંજલનું કોઈ અગમ્ય કારણોસર મૃત્યુ નીપજ્યું હોવા અંગેની જાણ અહીંના પોલીસ મથકમાં કરવામાં આવી છે.

દ્વારકામાં નજીક જુગાર રમતા બે ઝડપાયા

દ્વારકા તાલુકાના ભીમરાણા ગામેથી પોલીસે સ્ટ્રીટ લાઈટના અજવાળે જુગાર રમી રહેલા રણમલ સવા ચૌહાણ અને વસંત કારૂ જનગરીયાને ઝડપી લઈ, મુદ્દામાલ કબજે કર્યો હતો.