શાપરમાં ઘર પાસે રમતા સાત વર્ષના બાળકને કુતરાના ટોળાએ ફાડી ખાતા લોહી લુહાણ હાલતમાં કરુણ મોત નિપજતા શ્રમિક પરિવારમાં ઘેરો કલ્પાંત સર્જાયો છે. આવા ગંભીર બનાવો અવાર નવાર બનતા હોવા છતાં તંત્ર દ્વારા પગલાં ન લેવામાં આવતા માસુમ ભૂલકાઓ મોતને ભેટી રહ્યા છે.

પ્રાપ્ત વિગત મુજબ મૂળ બિહારના પટનાના વતની અને હાલ શાપરમાં આનંદગેટ નજીક રહેતા અજિતકુમાર યાદવનો સાત વર્ષનો પુત્ર આયુષ ગઈકાલે ઘર બહાર રમતો હતો ત્યારે ચારથી પાંચ કૂતરાઓનું ટોળું આવી આયુષ ઉપર હુમલો કરતા માથાથી પગ સુધી બચકા ભરતા બાળક ચીસો પાડવા લાગતા તેની માતા સહિતના દોડી આવ્યા હતા અને કુતરાઓના મોઢામાંથી બાળકને છોડાવી લોહીલુહાણ હાલતમાં સિવિલ હોસ્પિટલમાં ખસેડવામાં આવ્યો હતો પરંતુ સારવાર કારગત નીવડે પહેલા જ બાળકએ દમ તોડી દેતા બનાવ અંગે હોસ્પિટલ ચોકીના સ્ટાફે શાપર પોલીસને જાણ કરતા પોલીસ સ્ટાફે હોસ્પિટલ પહોંચી જરૂરી કાર્યવાહી કરી હતી. મ્રુતક બાળક બે ભાઇમાં નાનો હતો અને પિતા અશોકકુમાર કારખાનામાં કામ કરે છે. પિતા વતન જતા હોય ત્યારે પુત્રના મોતના સમાચાર સાંભળતા રસ્તામાંથી પરત ફર્યા હતા. માસુમ પુત્રના મોતથી પરિવારમાં ગમગીની છવાઈ છે.