સારવાર માટે હોસ્પીટલમાં ખસેડાયો : પોલીસ કાફલો દોડી ગયો

લાલપુર પોલીસ સ્ટેશનમાં ફરજ બજાવતા પોલીસ કર્મીને અકસ્માતે પગમાં ગોળી વાગતા અત્રેની જી.જી. હોસ્પીટલમાં સારવાર માટે ખસેડવામાં આવ્યો છે, બનાવની જાણ થતા પોલીસ કાફલો હોસ્પીટલ ખાતે દોડી ગયો હતો.
જામનગરમાં રહેતા અને લાલપુર પોલીસ સ્ટેશન ખાતે ફરજ બજાવતા મેહુલભાઇ ગઢવીને આજે સવારે પરવાનાવાળી પોતાની રિવોલ્વરમાં અકસ્માતે ગોળી છુટતા પગમાં ઇજા થઇ હતી આથી તેઓને તાકીદે સારવાર માટે જી.જી. હોસ્પીટલમાં ખસેડવામાં આવ્યો હતો. બનાવની જાણ થતા પોલીસ ટુકડી હોસ્પીટલ દોડી ગઇ હતી.
કોન્સ્ટેબલ મેહુલભાઇ પોતાની પરવાનાવાળી રીવોલ્વર સફાઇ કરતી વખતે અકસ્માતે ગોળી પગમાં છરકો થયાની વિગતો વહેતી થઇ હતી, જો કે અકસ્માતે હાથમાથી રિવોલ્વર નીચે પડતા ફાયર થયાનું અને પગના ભાગે વાગી હોવાનું પણ ચર્ચાઇ રહયું છે ખરેખર કેવી રીતે બનાવ બન્યો એ અંગે પોલીસ દ્વારા તપાસ હાથ ધરી છે.